Türkiyədə terrorçuluq ittihamı ilə 54 gün həbsdə saxlanılıb daha sonra Azərbaycana deportasiya edilən feminist fəal Xanım Babazadə başına gələnlərlə bağlı geniş açıqlama verib.

2023-cü ildə İstanbul Universitetinin antropologiya fakültəsinə qəbul olan Babazadə Türkiyədə yaşadığı müddətdə feminist və solçu icmaların fəal üzvü olub, müxtəlif etiraz aksiyalarında iştirak edib.

MİT-dən “agent ol” təklifi

Fəal bildirir ki, bu ilin avqustunda Türkiyənin Milli Kəşfiyyat Təşkilatının (MİT) əməkdaşı onunla əlaqə saxlayıb və ona agentlik təklif edib:

“Dedilər ki, sənin dostların haqqında məlumat istəyirik… Mən isə agent olmağı, dostlarımı satmağı heç vaxt qəbul etmədiyimi dedim.”

MİT əməkdaşı ona söhbəti heç kəsə bildirməməyi tapşırıb və xəbərdarlıq edib ki, əks halda dostları da problem yaşayacaq.

Həbs və zorakılıq iddiaları

Babazadə deyir ki, bu söhbətdən iki həftə sonra işlədiyi ofisə 5 polis daxil olub və onu həbs ediblər. O, polis əməkdaşlarının əvvəlcə onu Arnavutköy bölməsinə aparacaqlarını desələr də, əvəzində tanımadığı bir yerə aparıldığını və iki miniavtobusdan ibarət qrupun içinə atıldığını bildirir.

Onun sözlərinə görə, avtobusdakı qadınların arasında xəstələr də olub, su və yemək verilməyib. Babazadə deyir ki, bir polis şəkər xəstəsi qadını döyüb, o isə buna etiraz edərkən fiziki zorakılığa məruz qalıb:

“Saçımdan tutub başıma ard-arda zərbələr endirirdi… digər polislər onu saxlamağa çalışsa da, dayanmırdı.”

Antisanitar şərait, xəstəlik və “terrorçu” damğası

O bildirir ki, saxlanıldığı Çatalca təcridxanasında antisanitar şərait hökm sürüb, isti su olmayıb və məhbuslar dəmir çarpayılarda yatıblar:

“Bir həftə ac qaldım… soyuq su ilə duş almaqdan xəstələndim, iki dəfə sudurğa keçirdim.”

Babazadə deyir ki, polis onu təhvil verərkən “terrorçudur” deyərək xüsusi nəzarətə götürülməsini tapşırıb.

Azərbaycan sərhədində suallar və davam edən təqib iddiaları

54 günlük saxlanmadan sonra fəal Azərbaycana deportasiya olunub. İstanbul hava limanında polislər ona köhnə gigiyenik vasitələr verib, əllərini və ayaqlarını bağlayıb ikiqat maska taxıblar.

Bakıda Dövlət Sərhəd Xidmətinə təhvil verilən Babazadə deyir ki, onu sorğu-sual edən rəis pasportundakı xüsusi kodu görüb təəccüblənib:

“Dedim ki, etiraz aksiyasında iştirak etdiyim üçün.”

Onun sözlərinə görə, Azərbaycanda da izlənildiyini hiss edib və təhlükəsizliyi üçün ölkəni tərk etmək məcburiyyətində qalıb.

G89 kodu – terror şübhəlilərinə tətbiq olunan məhdudiyyət

Fəalın vəkilləri bildiriblər ki, o, G89 inzibati kodu ilə saxlanılıb. Bu kod adətən terrorçu təşkilatlara qoşulmaq niyyətində olan şəxslər üzrə tətbiq edilir.

Hazırda Türkiyə və Azərbaycan tərəfi Babazadənin ittihamlarına rəsmi reaksiya verməyib.