USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Həbsdə olan iqtisadçı Fazil Qasımov prezidentə müraciət etdi: “Ən böyük zərbəni məni müdafiə etməli olan vəkillərdən almışam”
Həbsdə olan iqtisadçı Fazil Qasımov Azərbaycan prezidenti İlham Əliyevə müraciət ünvanlayıb. Müraciətin mətnini onun yaxınları ictimaiyyətlə bölüşüb.
Qasımov məktubunda qeyd edir ki, Azərbaycanda istər dövlət hesabına, istərsə də müqavilə əsasında fəaliyyət göstərən bir çox vəkil öz vəzifələrini lazımi səviyyədə yerinə yetirmir və bu səbəbdən insanlar müdafiəsiz vəziyyətdə qalırlar:
“Təəssüf ki, Azərbaycanda istər dövlət hesabına, istərsə də müqavilə əsasında insanların hüquqlarını müdafiə etməli olan vəkillər müxtəlif səbəblərdən öz vəzifələrini layiqincə yerinə yetirmirlər. Nəticədə insanlar müdafiəsiz vəziyyətdə qalır və səmərəli hüquqi müdafiə vasitələrindən məhrum olurlar.”
O, Konstitusiyanın 61-ci maddəsində təsbit olunan keyfiyyətli hüquqi yardım almaq hüququnun cinayət icraatında ədalətin təmin olunması üçün mühüm əhəmiyyət daşıdığını vurğulayıb.
Qasımov həmçinin bildirib ki, bu hüququn təmin edilməməsi Avropa Konvensiyasının 6-cı maddəsi ilə qorunan ədalətli məhkəmə araşdırması hüququnun pozulmasına gətirib çıxarır:
“Keyfiyyətli hüquqi yardım almaq və müdafiə hüququnun təmin edilməməsi Avropa Konvensiyasının 6-cı maddəsi ilə təsbit edilmiş ədalətli məhkəmə araşdırması hüququnun kobud pozulmasıdır.”
İqtisadçı qeyd edir ki, 27 aylıq həbs dövründə ən böyük zərbəni öz hüquqlarını müdafiə etməli olan şəxslərdən aldığını düşünür:
“Qanunsuz olaraq həbsdə saxlanıldığım 27 ay ərzində mən ən böyük zərbəni məni müdafiə etməli olan vəkillərdən almışam.”
Müraciətdə Fazil Qasımov müdafiə hüququnun təmin olunmasını və işinə obyektiv yanaşılmasını istəyib.
Hazırda rəsmi qurumların müraciətə münasibəti açıqlanmayıb.
