Türk Dövlətləri Təşkilatının (TDT) Ağsaqqallar Şurasının rəhbəri Binəli Yıldırım Türkiyənin Səlcuq Universitetində keçirilən simpoziumda çıxışı zamanı Zəngəzur dəhlizinin Orta Dəhlizin tərkib hissəsi olduğunu və Türk dünyasının inkişafına mühüm töhfə verdiyini bildirib.

Yıldırımın sözlərinə görə, Azərbaycanın qərb bölgələri ilə Naxçıvan Muxtar Respublikası arasında marşrutun açılması türk xalqlarının potensialını daha da ortaya çıxaracaq və resursların onların rifahı naminə istifadəsinə imkan verəcək. “Zəngəzur dəhlizi Türk dünyasının gələcəyi üçün xüsusi əhəmiyyət kəsb edir”, – deyə o vurğulayıb.

O, həmçinin TDT ölkələri arasında ticarət göstəricilərinə diqqət çəkərək qeyd edib ki, hazırda ümumi xarici ticarət dövriyyəsi 1,1 trilyon dollar olsa da, bunun cəmi 70 milyard dolları qarşılıqlı ticarətin payına düşür.

B.Yıldırım 34 hərfdən ibarət ortaq türk əlifbasının tam tətbiqinin vacibliyini də qeyd edib: “Ortaq türk əlifbası ilə bağlı iş məqamları razılaşdırılıb. Onun faktiki tətbiqi vacibdir və bu, hər bir ölkənin siyasi iradəsi və səyindən asılıdır”.

TDT Ağsaqqallar Şurasının rəhbəri, həmçinin ortaq türk tarixi üzrə dərsliklərin hazırlanması, gömrük prosedurlarının sadələşdirilməsi və infrastrukturun inkişafı kimi məsələlərin türk dövlətlərinin inteqrasiyası üçün prioritet olduğunu vurğulayıb.