Son günlər Müdafiə naziri general-polkovnik Zakir Həsənovun təqaüdə göndəriləcəyi ilə bağlı iddialar yayılıb. Məlumata görə, nazirin fiziki və psixoloji yorğunluğu səbəbilə vəzifəsini tərk etməsi müzakirə olunur.

Bu barədə ehtimalı Müdafiə Nazirliyində çalışan bir polkovnik irəli sürüb. Onun sözlərinə görə, artıq bir neçə gündür ki, Həsənovun səlahiyyətlərini general-polkovnik Kərim Vəliyev icra edir və nazirliyin daxilində yeni təyinatla bağlı sərəncam gözlənilir.

Mənbənin bildirdiyinə görə, Zakir Həsənov son zamanlar Nazirliyin dəhlizlərində “ağır təəssüratlar” altında olduqca pəjmürdə və gərgin görünür. Qeyd edək ki, bu, hələlik rəsmi şəkildə təsdiqlənməyib və Müdafiə Nazirliyi məsələ ilə bağlı heç bir açıqlama verməyib.

Yeni nazir mülki şəxs ola bilər?

Nazirlik daxilində dolaşan ehtimallardan biri də yeni müdafiə nazirinin hərbçi yox, mülki şəxs olacağıdır. İddialara görə, bu şəxs hazırda müdafiə nazirinin müavini – baş direktor vəzifəsini icra edən Qurbanov Aqil Səlim oğlu ola bilər.

1986-cı il təvəllüdlü Aqil Qurbanovun karyerası əsasən özəl sektorla – xüsusən “PAŞA Holding” və “Sumqayıt Texnologiyalar Parkı” ilə bağlı olub. O, 2015–2019-cu illərdə “PAŞA Holding” MMC-də investisiyalar üzrə direktor, daha sonra “STP”nin Müşahidə Şurasının sədri olub. 2022-ci ilin dekabrında Müdafiə nazirinin hərbi-texniki təchizat üzrə müavini vəzifəsinə, 2023-cü ilin iyulunda isə baş direktor – nazir müavini postuna təyin edilib.

Bu məlumat rəsmi şəkildə təsdiqlənmədiyi üçün hələlik ehtimal səviyyəsində qalır. Məsələ ilə bağlı Müdafiə Nazirliyindən hər hansı açıqlama verilməyib.