Sentyabrın 7-də Xətai Rayon Məhkəməsi Abzas Media-nın baş redaktoru Sevinc Vaqifqızının və bu nəşrin jurnalisti Nərgiz Absalamovanın ilkin həbs müddətini üç ay uzadıb.

Məhkəmənin qərarına görə, onlar sentyabrın 20-nə qədər həbsdə qalmalıdır, bu barədə jurnalistlərin vəkilləri bildirib.

Vəkillər bu qərarlardan apellyasiya şikayəti verəcəklər.

Hafiz Babalının və Ülvi Həsənlinin həbs müddəti 3 ay uzadılıb

Bakının Xətai Rayon Məhkəməsi Abzas Media-nın işi üzrə həbs olunmuş araşdırmaçı jurnalist Hafiz Babalının həbs müddətini üç ay uzadıb.

Bu barədə onun vəkili Rəsul Cəfərov bildirib.

Onun sözlərinə görə, müdafiə tərəfi jurnalistin həbsdə saxlanılmasını əsassız hesab edir. Məhkəmənin qərarından apellyasiya şikayəti veriləcək.

Babalı ona qarşı irəli sürülən ittihamları qəbul etmir və jurnalist tədqiqatlarına görə təqib edildiyini bildirir.

Bu gün Abzas Media-nın direktoru Ülvi Həsənlinin də ilkin həbs müddəti üç ay uzadılıb. O da irəli sürülən ittihamları qəbul etmir.

Qeyd edək ki, Babalı və Həsənli 2023-cü ilin noyabr - 2024-cü ilin yanvar aylarında Abzas Media-nın işi üzrə həbs edilən altı jurnalist və mətbuat işçisi arasında idi. Sonradan bu iş üzrə iqtisadçı Fərid Mehralızadə də həbs olunub.

Əvvəlcə onların hamısına CM-in 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham irəli sürülüb. Lakin 16-19 avqust tarixlərində jurnalistlərə qarşı daha ağır ittihamlar - CM-in 192.3.2 (qanunsuz sahibkarlıq, külli miqdarda gəlir əldə etməklə törədildikdə), 193-1.3.1 və 193-1.3.2 (cinayət yolu ilə əldə edilmiş əmlakı leqallaşdırma, qabaqcadan əlbir olan bir qrup şəxs tərəfindən törədildikdə), 206.4 (qaçaqmalçılıq, mütəşəkkil dəstə tərəfindən törədildikdə), 320.1 və 320.2 (sənədləri saxtalaşdırma və saxta sənədlərdən istifadə etmə), 213.2.1 (vergilərdən yayınma, mütəşəkkil dəstə tərəfindən törədildikdə) maddələri ilə ittihamlar irəli sürülüb.

Bu ittihamlara görə 12 ilədək azadlıqdan məhrumetmə cəzası nəzərdə tutulub.

Jurnalistlər bütün ittihamları rədd edir, hakimiyyətin yüksək eşelonlarında korrupsiya faktlarını araşdırdıqlarına görə təqib olunduqlarını bildirirlər.