Xəbər verdiyimiz kimi 18 oktyabr 2024-cü il tarixdə internet üzərindən Azərbaycan Xalq Parlamentinin Təsis Konfransı keçirilib.

Təsis Konfransını iştirakçıların ən yaşlı nümayəndəsi Əlövsət Sadıqlı açıb. Ə.Sadıqlı Azərbaycan Xalq Parlamentinin təsis edilməsi səbəbləri barədə məlumat verdi və Təsis Konfransını açıq elan etdi.

Təsis Konfransında Azərbaycan Respublikasının dövlət himni səsləndirildikdən sonra onun işinin təşkili ilə bağlı Konfransın Sədarəti və Katibliyi seçildi. Səsvermə yolu ilə Sədarətə Namizəd Səfərov, Qurban Məmmədli və Ataxan Əbilovun, Katibliyə Abid Qafarov, Teymur Eminbəyli, Əli Quliyev, Rəşad Dadaşov və Leyli Şərifzadənin namizdlikləri irəli sürülərək, səsvermə yolu ilə təsdiq edildi.

Namizəd Səfərovun sədrliyi ilə Təsis Konfransının iştirakçıları bir-bir təqdim edilərək, onların səlahiyyəti təsdiq edildi.

Bundan sonra Təsis Konfransının aşağıdakı Gündəliyi səsə qoyularaq qəbul edildi:

1) Azərbaycan Xalq Parlamentinin təsis edilməsi haqqında Bəyannamənin təqdimatı və qəbulu;

2) Azərbaycan Xalq Parlamentinin Nizamnaməsinin layihəsinin müzakirəsi və qəbulu;

3) Azərbaycan Xalq Parlamentinin təsis edilməsi haqqında qərarla bağlı müzakirələr və yekun qərarın qəbul edilməsi;

4) Azərbaycan Xalq Parlamentinin Təsis Konfransının Azərbaycan Respublikasındakı vəziyyətlə bağlı COP 29 iştirakçılarına və dünya ictimaiyyətinə Müraciətin qəbulu;

5) Azərbaycan Xalq Parlamentinin fəaliyyətinə informasiya dəstəyi ilə bağlı ABA Media, Ayvazoğlu TV, Azad Söz, AzerFreedom TV, Journalist Army TV və Xural TV kanallarının təsis etdiyi "Demokratiya naminə - media birliyi" Konfederasiyasının yaradılmasının elanı;

6) Azərbaycan Xalq Parlamentinə seçkilərin keçirilməsilə bağlı Seçki Komissiyasının say tərkibinin müəyyən edilməsi və seçilməsi;

7) Azərbaycan Xalq Parlamentinə seçki gününün elan edilməsi;

8) Yekun müzakirələr və Konfransın bağlı elan edilməsi.

Birinci məsələ ilə bağlı Konfransa təqdim edilən Azərbaycan Xalq Parlamentinin təsis edilməsi haqqında Bəyannamə Rəşad Dadaşov tərəfindən oxunaraq, səsvermə yolu ilə qəbul edildi.
İkinci məsələ ilə bağlı hüquqşünas Qurban Məmmədli Azərbaycan Xalq Parlamentinin Nizamnaməsinin layihəsini Konfrans iştirakçılarının nəzərinə çatdırdı. Azərbaycan Xalq Parlamentinin Nizamnaməsi səsə qoyularaq qəbul edildi.
Üçüncü məsələ, Azərbaycan Xalq Parlamentinin təsis edilməsi haqqında Konfrans iştirakçıları çıxışlar etdilər. Məsələ ətrafında hüquqşünas Ataxan Əbilov Azərbaycan Xalq Parlamentinin təsis edilməsi haqqında qərarın mətnini elan etdi. Qərar səsə qoyularaq, yekdilliklə qəbul edildi.

Dördüncü məsələ ilə bağlı Əli Quliyev Azərbaycan Xalq Parlamentinin Təsis Konfransının Azərbaycan Respublikasındakı vəziyyətlə bağlı COP 29 iştirakçılarına və dünya ictimaiyyətinə Müraciətin mətnini elan etdi və sənəd səs çoxluğu ilə qəbul edildi.

Azərbaycan Xalq Parlamentinin fəaliyyətinə informasiya dəstəyi ilə bağlı YouTube üzərindən yayımlanan kanalların əməkdaşlığı haqqında Tural Sadıqlı məlumat verdi. Bu kanalların birgə əməkdaşlığı Konfrans iştirakçıları tərəfindən alqışlandı.

Bundan sonra 7 nəfərdən ibarət, aşağıdakı tərkibdə “Seçki Komissiyası”nın yaradılması qərara alındı:

1. Elxan Nuriyev
2. Xuraman Qafarova
3. Şəmsəddin Cəmiyev
4. Kəmalə Mehdiyeva
5. Rasim Əlizadə
6. Marif Ağaməmmədov
7. Cavanşir Abbasov

Azərbaycan Xalq Parlamentinə seçkilərin keçirilməsilə bağlı 23-29 dekabr tarixlərində seçkilərin internet üzərindən keçirilməsi günü kimi təyin edildi.

Sonda Konfrans sədrlərindən Namizəd Səfərov Azərbaycan Xalq Parlamentinin təsis edilməsilə bağlı Konfrans iştirakçılarını və Azərbaycan xalqını təbrik etdi və Konfransı bağlı elan etdi.