Azərbaycan Respublikasının Prezidenti İlham Əliyev oktyabrın 16-da Misir Ərəb Respublikasının ölkəmizdə yeni təyin olunmuş fövqəladə və səlahiyyətli səfiri Houssam-Eldine Redanın etimadnaməsini qəbul edib.

Səfir etimadnaməsini dövlət başçısına təqdim edib. Prezident İlham Əliyev, ilk növbədə, Şarm-əl-Şeyxdə keçirilən Yaxın Şərq Sülh Sammitinin yüksək səviyyədə təşkilinə görə Misir Ərəb Respublikasını təbrik edib. Dövlət başçısı ABŞ Prezidenti Donald Tramp və Misir Prezidenti Əbdülfəttah əs-Sisi tərəfindən Azərbaycanın bu tədbirə dəvət olunmasını iki ölkə arasında mövcud etimad və dostluq münasibətlərinin göstəricisi kimi dəyərləndirib.

Prezident İlham Əliyev Əbdülfəttah əs-Sisinin Azərbaycana səfərini və özünün Misirə rəsmi səfərini məmnunluqla xatırladığını bildirib, həmin səfərlər zamanı müzakirə olunan məsələlərin icrası ilə bağlı fikirlərini bölüşüb.

Səfir Houssam-Eldine Reda Misir Prezidenti Əbdülfəttah əs-Sisinin salamlarını dövlətimizin başçısına çatdırıb. Prezident İlham Əliyev salamlara görə minnətdarlığını bildirib və öz salamlarını da Misir Prezidentinə çatdırmağı xahiş edib.

Görüşdə Hökumətlərarası Komissiyanın fəaliyyətinin əhəmiyyəti vurğulanıb, yaxın vaxtlarda komissiyanın növbəti iclasının keçiriləcəyi qeyd olunub. Bakı ilə Şarm-əl-Şeyx və Qahirə arasında birbaşa aviareyslərin mövcudluğu turizm sahəsində əməkdaşlığın genişlənməsinə mühüm töhfə kimi dəyərləndirilib.

Söhbət zamanı mədəni və humanitar sahələrdə əməkdaşlığın perspektivləri də müzakirə edilib.