Sabiq deputat Tahir Kərimli Ramiz Mehdiyev haqqında son günlər artan müzakirələrə münasibət bildirib.

O, bildirib ki, adətən Azərbaycanda hər hansı şəxs və ya hadisə barədə tənqidi fikirlər dövlət başçısı və ya dövlət qurumları addım atandan sonra kütləvi şəkildə yayılır:

“Adətən bizdə şəxs, yaxud hadisə haqqında dövlət başçısı, dövlət orqanları addım atandan sonra araşdırmalar, tənqidi mülahizələr zəncirvari reaksiya kimi baş alıb gedir. Həmişə bu cür görmüşük. Ramiz Mehdiyevlə də bağlı eyni prosesi müşahidə edirik”.

Tahir Kərimli əlavə edib ki, onun Ramiz Mehdiyevlə yaxın münasibəti olması barədə yayılan iddialar həqiqətə uyğun deyil:

“Çox ehtiyatlı olmaq lazımdır. Təsəvvür edin ki, mənim özüm barədə nələr deyirlər. Guya Ramiz Mehdiyev barədə demişəm ki, müstəqil dövlət qurulmasında bu adamın müstəsna rolu olub. Sanki Ramiz Mehdiyevlə birlikdə xalq hərəkatında olmuşuq, o da mənimlə istiqlalçı deputat olub. Adama yalanı, şəri yaxanda heç olmasa həqiqətə oxşasın”.

Sabiq deputat Ramiz Mehdiyevlə cəmi bir dəfə rastlaşdığını vurğulayıb:

“Ramiz Mehdiyevlə ömrümdə bircə dəfə rastlaşmışam. Heydər Əliyev Sarayında gözləyirdik, nazirlər, digər vəzifəli şəxslər “farağat” komandasında durmuşdular. Çünki Mehdiyev Baş nazirlə irəliləyirdi. Mən də Fərəc Quliyevlə bir yerdə dayanmışdım. Ramiz Mehdiyev gəlib bizimlə görüşdü, dedi ki, müsahibəni oxumuşam. Fərəc bəy dedi ki, görürsən, sənə əməlli başlı qiymət verir. Halbuki o zaman çoxları ölərdi ki, gedib Ramiz Mehdiyevə salam versin. Bundan başqa ömrümdə bu insanla bir dəfə də ünsiyyətim olmayıb”.