Prezident Administrasiyasının sabiq rəhbəri, akademik Ramiz Mehdiyevin cinayət məsuliyyətinə cəlb olunaraq barəsində 4 aylıq ev dustaqlığı qətimkan tədbiri seçilməsi xəbər verilir. İNFOAZ.WS-ün yenisabah-a istinadən verdiyi məlumata görə, R.Mehdiyevin qızı Kamilə Əliyeva da yüksək vəzifədə çalışır.

Kamilə Əliyeva Bakı Dövlət Universitetinin Sosial və Pedaqoji Psixologiya kafedrasının müdiridir. Psixologiya elmləri doktoru, professor olan K.Əliyeva uzun illərdir bu vəzifəni icra edir və həmçinin keçmiş deputat İlham Əliyevin həyat yoldaşıdır.

K.Əliyeva 1970-ci ildə Moskva şəhərində anadan olub. 1987-ci ildə BDU-nun Biologiya fakültəsinə daxil olub və 1992-ci ildə həmin fakültəni fərqlənmə diplomu ilə bitirərək Zoologiya İnstitutunda əmək fəaliyyətinə başlayıb. 1998–2002-ci illərdə isə BDU-nun Psixologiya kafedrasında dissertant olub.

O, 2002-ci ildə “Yaradıcılıq şəxsiyyətin inkişaf amili kimi” mövzusunda namizədlik, 2009-cu ildə isə “Şəxsiyyətin yaradıcı potensialının formalaşmasının psixoloji problemləri” mövzusunda psixologiya elmləri doktorluq dissertasiyasını müdafiə edib.

K.Əliyeva 1999-cu ildən BDU-nun Psixologiya kafedrasında müəllim, 2004-cü ildən dosent, 2010-cu ildən isə professor vəzifəsində çalışır. Eyni zamanda, 2010-cu ildən Sosial və Pedaqoji Psixologiya kafedrasının müdiri vəzifəsini icra edir.

Xatırladaq ki, R.Mehdiyevin oğlu, general-mayor Teymur Mehdiyev isə Fövqəladə Hallar Nazirinin müavinidir.

Bakı şəhəri Səbail Rayon Məhkəməsi akademik Ramiz Mehdiyev barəsində xüsusilə ağır cinayət əməllərinə görə 4 aylıq ev dustaqlığı qətimkan tədbiri seçib. R.Mehdiyev Cinayət Məcəlləsinin 278.1 (dövlət hakimiyyətini ələ keçirməyə yönələn əməllər), 274 (dövlətə xəyanət) və 193-1.3.2 (cinayət yolu ilə əldə edilmiş əmlakı leqallaşdırma) maddələri ilə ittiham olunur.