Dövlət satınalmalarının vahid internet portalında yerləşdirilən məlumata əsasən, Elm və Təhsil Nazirliyi 2019-cu ildən bu yana Ramiz Mehdiyevin oğlu Teymur Mehdiyevə məxsus olan “Şərq-Qərb” nəşriyyat şirkəti ilə 30 milyon manatdan çox məbləğdə tender müqavilələri imzalayıb.

Müqavilələrin predmeti 2019–2025-ci tədris illəri üçün dərsliklərin, metodik vəsaitlərin, iş dəftərlərinin, məktəb sənədlərinin, eləcə də dövlət nümunəli təhsil sənədləri blanklarının çapı ilə bağlıdır.

“Şərq-Qərb” ASC-nin tərəfdaşları sırasında Heydər Əliyev Fondu, Mədəniyyət Nazirliyi, Elm və Təhsil Nazirliyi, Azərsun Holdinq və Dövlət İmtahan Mərkəzi kimi qurumlar da yer alır.

Qeyd edək ki, bu müqavilələr Ramiz Mehdiyevin Prezident Administrasiyasının rəhbəri vəzifəsindən uzaqlaşdırılmasından sonrakı dövrə təsadüf edir.

Məlumatlara görə, hazırda nəşriyyat şirkətinin İqtisadiyyat Nazirliyi yanında Dövlət Vergi Xidmətinin Milli Gəlirlər Baş İdarəsinə 52 144 manat vergi borcu mövcuddur.

Kommersiya qurumlarının dövlət reyestrinə əsasən, “Şərq-Qərb” ASC 14 sentyabr 2001-ci ildə dövlət qeydiyyatına alınıb. Nizamnamə kapitalı 589 min 880 manat olan şirkət Bakı şəhəri, Əhmədli qəsəbəsi, Aşıq Ələsgər küçəsi 17 ünvanında yerləşir.

Qiymətli Kağız Mülkiyyətçilərinin Reyestr məlumatlarına görə, ASC-nin səhmlərinin 96,5 faizi Mehdiyev Teymur Ramiz oğluna məxsusdur.