Xaçmaz rayonunun Nağıoba və Kiçik Baraxum kəndləri ərazisindəki meşə massivində sağlam ağacların qanunsuz şəkildə kəsildiyi müşahidə olunur. Ərazidə aparılan müşahidələr zamanı palıd və ağcaqayın cinsindən olan, bəzən bir-bir, bəzən də iki-iki kəsilmiş ağaclar aşkar edilib. Kötüklərin görünüşünə əsasən, ağacların xəstə deyil, sağlam olduqları müəyyən edilib.

Müşahidələr nəticəsində azı 10-dan çox ağacın kəsildiyi müəyyən olunub. Yerli sakinlər kamera qarşısında danışmaqdan çəkiniblər, lakin onlar meşələrdə hər il belə kəsimlərin baş verdiyini təsdiqləyiblər.

Bu vəziyyət kəndlərdə qazlaşma problemini də gündəmə gətirir. Nağıoba kəndinə ötən ilin noyabrında qaz verilsə də, evlərin sənədləşmə (kupça) məsələləri qaydasında olmadığından hazırda yalnız 7-8 evdə qazdan istifadə olunur. Qonşu Kiçik Baraxum, Sibiroba və Hacı Abrahmanoba kəndlərində isə ümumiyyətlə mavi yanacaq yoxdur.

Məsələ ilə bağlı Daxili İşlər Nazirliyinin Mətbuat Xidmətinin Quba regional qrupundan Bizim.Mediaya bildirilib ki, Xaçmaz rayonunun Nağıoba və Kiçik Baraxum kəndləri ərazisində ağacların qanunsuz kəsilməsi faktı üzrə Rayon Polis Şöbəsində prosessual araşdırma aparılır. Araşdırmanın nəticələrinə uyğun olaraq hüquqi tədbirlər görüləcək.