“Meclis.info” platformasının həbsdə olan rəhbəri İmran Əliyevin səhhətində ciddi problemlər yaranıb.

Bu barədə “Abzas Media”ya onun atası Bağır Əliyev məlumat verib. O bildirib ki, oğlu bel və oynaq ağrılarından əziyyət çəkir, həmçinin onun bədənində mənşəyi məlum olmayan şişlər yaranıb.

Bağır Əliyevin sözlərinə görə, uzunmüddətli məhkəmə prosesi və Bakı İstintaq Təcridxanasındakı ağır şərait İmran Əliyevin həm fiziki, həm də psixoloji vəziyyətinə ciddi təsir göstərib:

“İmranın psixoloji vəziyyəti çox gərgindir. Bədənində mənşəyi bilinməyən şişlər yaranıb. Məhkəmə işinin 1 il 6 ay uzanması onu çox sarsıdıb. Oktyabrın 14-də keçiriləcək iclası ümidlə gözləyirdi, lakin cəmi bir gün qalmış prosesin təxirə salındığını öyrənəndə əsəb pozuntusu keçirib. Məhkəmənin təxirə salındığı deyilsə də, yarım saat qalmış gəliblər ki, məhkəmə olacaq, zorla aparıblar”.

Atanın fikrincə, məhkəmə prosesi məqsədli şəkildə ləngidilir və şahidlərin dindirilməməsi də bunu göstərir.

Oktyabrın 14-də Bakı Ağır Cinayətlər Məhkəməsində hakim Roman Ələkbərlinin sədrliyi ilə “Meclis.info işi” üzrə növbəti iclas keçirilib.

Prosesdə təqsirləndirilənlər İmran Əliyev, polis nəzarətində olan Elgiz Qəhrəman və Tamella Musayeva iştirak ediblər.

İclasda İmran Əliyev bildirib ki, məhkəməyə aparılacağını yalnız yarım saat əvvəl öyrənib və təcridxana rəhbərliyi tərəfindən prosesə məcburi şəkildə gətirilib. O, həmçinin məhkəmələr arasında uzun fasilələrə etiraz edib.

Hakim Roman Ələkbərli isə növbəti iclasların daha müntəzəm keçiriləcəyini vəd edib.

İclasda ifadə verən şahid, vəkil Rövşanə Rəhimli bildirib ki, qadın hüquqları və məişət zorakılığı sahəsində ABŞ və Avropa proqramlarının məzunudur və bu çərçivədə müxtəlif təlimlərdə iştirak edib:

“İmran Əliyev məni belə bir təlimə təlimçi kimi dəvət etmişdi. Təlimdən ödəniş alıb-almadığımı xatırlamıram. İstintaqa təqdim olunan qəbzdəki imza mənə aid deyil”.

Rövşanə Rəhimli həmçinin Tamella Musayevanı tanımadığını, Elgiz Qəhrəmanla isə yalnız dost münasibətinin olduğunu deyib.

Digər şahid Əhməd İsmayılov bildirib ki, İmran Əliyevə dövlət qurumlarına informasiya sorğularının hazırlanmasında və “Meclis.info” üçün komikslərin hazırlanmasında kömək edib:

“Bu işləri könüllü əsaslarla görmüşəm. İstintaq zamanı təqdim edilən ödəniş qəbzlərindəki imzalar mənə aid deyil və həmin sənədlərin mötəbərliyinə inanmıram”.

Növbəti məhkəmə prosesi noyabrın 4-nə təyin edilib.

Xatırladaq ki, İmran Əliyev ötən il aprelin 18-də Heydər Əliyev Beynəlxalq Hava Limanında saxlanılıb. Ona qarşı əvvəlcə Cinayət Məcəlləsinin 206.3.1 və 206.3.2 (qaçaqmalçılıq) maddələri ilə ittiham irəli sürülüb, sonradan bu siyahı 8 maddəyə qədər genişləndirilib.

İctimai fəallar Elgiz Qəhrəman və Tamella Musayeva da eyni iş üzrə təqsirləndirilən şəxs qismində fevral ayında cinayət məsuliyyətinə cəlb olunublar. Onlar barəsində polis nəzarəti qətimkan tədbiri seçilib.

Hazırda hər üç şəxs 12 ilədək həbs cəzası nəzərdə tutan 8 ağır maddə ilə ittiham olunur.