Dövlət İmtahan Mərkəzi (DİM) xüsusi hazırlıq keçmiş və şəhadətnamə almaq istəyən taksi minik avtomobili sürücüləri üçün növbəti imtahanın tarixini açıqlayıb. Növbəti imtahan noyabrın 13-də keçiriləcək.

DİM-dən verilən məlumata görə, imtahanda iştirak etmək istəyən sürücülər barədə məlumatlar artıq müvafiq qurumlar tərəfindən Mərkəzə təqdim olunub. Namizədlər 17 oktyabr saat 12:00-dan 31 oktyabr saat 18:00-dək qeydiyyatdan keçməlidirlər.

Qeydiyyat prosesi DİM-in internet saytı (https://ekabinet.dim.gov.az) üzərindən aparılır. Namizədlər burada “Şəxsi kabinet” yaratmalı və “Taksi minik avtomobillərinin sürücülərinin etik davranış və avtomobil nəqliyyatı ilə sərnişin daşımalarını tənzimləyən normativ hüquqi aktlara dair xüsusi hazırlığının qiymətləndirilməsi üzrə test imtahanında iştirakı üçün qeydiyyat” xidmətindən istifadə etməlidirlər.

İmtahanda iştirak ödənişlidir. Namizədlər “Şəxsi kabinet”in pul hesabına 35 manat məbləğində vəsait əlavə etməlidirlər. Qeydiyyatdan keçib imtahanda iştirak etməyən şəxslərin ödədiyi məbləğ geri qaytarılmır.

Test imtahanı DİM-in Elektron imtahanlar korpusunda (Bakı şəhəri, Binəqədi rayonu, S.S.Axundov küçəsi, 50) keçiriləcək. Namizədlər imtahana buraxılış vərəqəsini qeydiyyat prosesi başa çatdıqdan sonra, imtahana 3 gün qalmış, DİM-in saytında “Elektron imtahanlara buraxılış vərəqələri və nəticələrin çapı” xidməti vasitəsilə çap edə biləcəklər.

İmtahan bir saat davam edəcək və iştirakçılara 20 test tapşırığı təqdim olunacaq. Hər düzgün cavab 1 balla qiymətləndirilir, səhv cavablar nəticəyə təsir göstərmir. 10 və daha çox bal toplayan şəxslər imtahanı uğurla keçmiş sayılırlar və onlara 7 il müddətinə etibarlı şəhadətnamə veriləcək.

İmtahanın məzmunu Rəqəmsal İnkişaf və Nəqliyyat Nazirliyi tərəfindən təsdiq edilmiş “Sürücülərin etik davranışı və avtomobil nəqliyyatı ilə sərnişin daşımalarını tənzimləyən normativ hüquqi aktlara dair” proqram əsasında hazırlanıb.