Rusiyanın Ulyanovsk vilayətindəki azərbaycanlı diasporasının rəhbəri və qubernatorun ictimai əsaslarla müşaviri İslam Hüseynov Rusiya vətəndaşlığından çıxarılıb. Bu barədə məlumatı yerli hüquq-mühafizə orqanlarındakı mənbə “RBK” nəşrinə təsdiqləyib. Hüseynov isə məsələ ilə bağlı şərh verməkdən imtina edib.

56 yaşlı İslam Hüseynov Gəncə şəhərində anadan olub, lakin son 20 ildir Ulyanovskda yaşayır. O, 2005-ci ildən oradakı Azərbaycan diasporuna rəhbərlik edir.

2015-ci ildə Hüseynov böyük həcmdə dələduzluqda və gəlirlərin leqallaşdırılmasında ittiham olunub. İstintaqa görə, o, bələdiyyə mülkiyyətində olan torpaq sahəsini real dəyərindən xeyli ucuz — 776 min rubla əldə edib. Sahənin bazar qiymətinin 6 milyon rubl olduğu müəyyən edilib. Məhkəmə onu dələduzluq ittihamı ilə təqsirli bilib, lakin gəlirlərin leqallaşdırılması ilə bağlı bəraət verib. Hüseynov 4 il şərti həbs və 1 milyon rubl cərimə cəzası alıb, ittihamları qəbul etməyib.

Ona iki dəfə sui-qəsd edilib. 2009-cu ildə onu vurmaq istəyən şəxs səhvən Ulyanovsk gömrük əməkdaşını və həyat yoldaşını yaralayıb. 2012-ci ildəki ikinci hücum zamanı isə Hüseynovun mühafizəçisi həlak olub.

İslam Hüseynovun təşəbbüsü ilə Ulyanovskda Azərbaycanın sabiq prezidenti Heydər Əliyevin şərəfinə abidə qoyulub — bu, Rusiyada H.Əliyevə həsr olunmuş ilk abidədir. Həmçinin şəhərdə Heydər Əliyevin adını daşıyan meydan və 78 nömrəli məktəb yaradılıb.

2022-ci ildə Hüseynov Ulyanovsk vilayətinin qubernatoru Aleksey Ruskinin müşaviri təyin edilib. O, Azərbaycan Prezidenti İlham Əliyev tərəfindən “Tərəqqi” medalı ilə, həmçinin Ulyanovsk vilayəti hökuməti tərəfindən “Xalqlar Dostluğu” medalı ilə təltif olunub.

Hüseynovun vətəndaşlıqdan çıxarılması Azərbaycan-Rusiya münasibətlərində gərginliyin artdığı dövrə təsadüf edir.

Xatırladaq ki, 2024-cü il dekabrın 25-də AZAL-a məxsus sərnişin təyyarəsi Bakıdan Qroznıya uçarkən Qazaxıstanın Aktau şəhəri yaxınlığında qəzaya uğramış, 38 nəfər həlak olmuşdu. “Reuters” və “Euronews” həmin vaxt Bakıdakı rəsmi mənbələrə istinadən bildirmişdi ki, təyyarə Rusiya hava hücumundan müdafiə sistemi tərəfindən vurulub.

Bundan sonra iki ölkə arasında münasibətlərdə gərginlik daha da artıb. İyunun 27-də Rusiya Federal Təhlükəsizlik Xidməti (FTX) Yekaterinburqda azərbaycanlılara qarşı reyd keçirib, onlarla şəxs saxlanılıb, onlardan ikisi saxlanma məntəqəsində ölüb. İyul ayında isə Yekaterinburq şəhərində Azərbaycan diasporunun rəhbəri Şahin Şıxlinski həbs edilib və ona qarşı iki ağır maddə — 318-ci (hakimiyyət nümayəndəsinə qarşı zor tətbiqi) və 105-ci (qəsdən adam öldürmə) maddələri ilə cinayət işi açılıb.