Azərbaycan Respublikasının Prezidenti İlham Əliyev oktyabrın 16-da BMT-nin Məskunlaşma Proqramının (UN-Habitat) icraçı direktoru Anaklaudia Rossbaxı qəbul edib.

Görüş zamanı qonağın Xankəndi şəhərində keçirilən III Azərbaycan Milli Şəhərsalma Forumunda iştirakının önəmi vurğulanıb. Anaklaudia Rossbax forumun yüksək səviyyədə təşkil olunduğunu və şəhərsalma məsələləri ilə bağlı aktual müzakirələrin aparıldığını bildirib.

Azərbaycan-UN-Habitat əməkdaşlığı çərçivəsində ölkəmizdə artıq bir neçə milli şəhərsalma forumunun keçirildiyi qeyd olunub. Görüşdə Qarabağ və Şərqi Zəngəzur iqtisadi rayonlarında aparılan irimiqyaslı bərpa-yenidənqurma işləri və işğaldan azad edilmiş ərazilərdə tətbiq olunan müasir şəhərsalma modeli də müzakirə edilib.

Anaklaudia Rossbax Azərbaycanın BMT-nin Məskunlaşma Proqramına göstərdiyi maliyyə dəstəyi və COP29-un uğurla keçirilməsini yüksək qiymətləndirib. O, iqlim gündəliyi ilə urbanizasiya fəaliyyətlərinin bir araya gətirilməsində Azərbaycanın təşəbbüslərini məmnunluqla qeyd edib.

Görüşdə həmçinin 2026-cı ildə Azərbaycanda keçiriləcək Ümumdünya Şəhərsalma Forumunun 13-cü Sessiyasına hazırlıq məsələləri və Azərbaycan-UN-Habitat əməkdaşlığının gələcək perspektivləri müzakirə olunub.