“Qarabağ” klubunun baş məşqçisi Qurban Qurbanov idman geyimləri sahəsində yeni biznes qurub. Məşhur mütəxəssis forma satışı üzrə şirkət yaradaraq bu istiqamətdə fəaliyyətə başlayıb.

Yeni şirkət dünyaca məşhur “Adidas”, “Joma” və “Jako” markalarının Azərbaycandakı rəsmi distribütoru kimi çıxış edir. Buradan müxtəlif idman geyimləri və komanda formalarının topdan sifarişi mümkündür.

Artıq ölkədə fəaliyyət göstərən bir neçə klub Qurban Qurbanovun şirkəti ilə əməkdaşlığa başlayıb. Onların arasında “Zirə”, “Turan Tovuz” və “Şəfa” klubları da yer alır.

Qeyd edək ki, bir müddət əvvəl mediada Qurban Qurbanovun “Şəfa” klubuna jest etdiyi barədə xəbərlər yayılmışdı. Məlum olub ki, əslində məsələ geyim sifarişi ilə bağlı imiş. Belə ki, “Şəfa” klubu Qurban Qurbanovun şirkətindən “Jako” markalı formalar sifariş edib, lakin çatdırılma gecikdiyi üçün şirkət müvəqqəti olaraq anbarda olan “Adidas” geyimlərini həmin klubun istifadəsinə verib.