USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Əli Zeynala yalnız şüşə arxasından görüşə icazə verilib
“Toplum TV işi” üzrə həbsdə saxlanılan Demokratik Təşəbbüslər İnstitutunun əməkdaşı Əli Zeynala Bakı İstintaq Təcridxanasında ailə üzvləri ilə yalnız şüşə arxasından görüşməyə icazə verilib.
Oktyabrın 12-də ailəsi ilə görüşən Əli Zeynala konfidensial (şüşəsiz) görüşə icazə verilməyib. Ailəsinin bildirdiyinə görə, Əli Zeynal bu məhdudiyyətin səbəbini təcridxanadan ictimaiyyətə çatdırdığı yazılarla əlaqələndirir.
Əli Zeynal daha əvvəl təcridxanadan göndərdiyi yazılarda dustaqların saxlanma şəraitinin ağır olduğunu və dərman gətirilməsi üçün rüşvət tələb olunduğunu qeyd etmişdi. O, bundan öncə də yazılarına və məhkəmə çıxışlarına görə cərimə kamerasına (karserə) salınıb.
“Toplum TV işi” üzrə ümumilikdə 10 nəfər barəsində cinayət işi açılıb. III Respublika Platformasının spikeri Akif Qurbanov, bu qurumun qurucu heyət üzvü Ruslan İzzətli, “Toplum TV”-nin həmtəsisçisi Ələsgər Məmmədli, videoredaktor Müşfiq Cabbar, jurnalist Fərid İsmayılov, Demokratik Təşəbbüslər İnstitutunun əməkdaşları Əli Zeynal, İlkin Əmrahov və Ramil Babayev həbs olunublar.
Jurnalist Elmir Abbasov polis nəzarətinə verilib, “Toplum TV” redaktoru Şahnaz Bəylərqızı isə əvvəlcə ev dustaqlığına buraxılıb, daha sonra onun barəsində polis nəzarətinə verilməklə qətimkan tədbiri seçilib.
İlkin olaraq “qaçaqmalçılıq” ittihamı ilə saxlanılan şəxslərə sonradan daha ağır ittihamlar irəli sürülüb. Onlar özlərini təqsirli bilmirlər və həbslərinin siyasi sifariş əsasında həyata keçirildiyini bildirirlər.
