Avropa İnsan Hüquqları Məhkəməsi (AİHM) oktyabrın 14-də informasiya azadlığı ilə bağlı Azərbaycana qarşı qərar qəbul edib. Vəkil Fariz Namazlı bildirib ki, qərar hazırda “Meydan TV işi” üzrə həbsdə olan jurnalist Ramin Dekonun 2012-ci ildəki şikayəti əsasında verilib.

Qərarda vurğulanır ki, jurnalist 2012-ci ildə Prezident Administrasiyasına sorğu göndərərək prezident tərəfindən mənzil verilmiş tanınmış şəxslərin və həmin mənzillərin maliyyə mənbələrinin siyahısını istəyib. Yerli məhkəmələr onun şikayətini təmin etməyib.

AİHM qeyd edib ki, ərizəçi “ictimai nəzarətçi” funksiyasını yerinə yetirən jurnalist kimi çıxış edib və tələb etdiyi məlumat onun peşə fəaliyyəti üçün vacib olub. Məlumat dövlət vəsaiti hesabına vətəndaşlara mənzil verilməsi və həmin mənzillərin maliyyə mənbələri ilə bağlı olduğundan əhəmiyyətli ictimai məsələ təşkil edib.

Məhkəmə bildirib ki, Prezident Administrasiyası sorğunu cavabsız qoyub, məlumat sahibini müəyyən etməyib və sorğunu müvafiq orqana yönləndirməyib. Yerli məhkəmələr isə bu fəaliyyətsizliyə hüquqi qiymət verməyib.

AİHM qərar verib ki, Prezident Administrasiyasının hərəkətsizliyi ərizəçinin hüququna qanunsuz müdaxilə hesab olunur və bu, Avropa İnsan Hüquqları Konvensiyasının 10-cu (özünüifadə azadlığı) və 13-cü (effektiv hüquqi vasitəyə çıxış) maddələrinin pozulması deməkdir. Məhkəmə maddi kompensasiya təyin etməyib, yalnız pozuntunun təsdiqi ilə kifayətlənib.

Qeyd edək ki, 2024-cü il dekabrın 6-da “Meydan TV işi” üzrə saytın Azərbaycan nümayəndəliyinin rəhbəri Aynur Elgünəş və jurnalistlər Ramin Deko, Aysel Umudova, Aytac Tapdıq, Xəyalə Ağayeva və Natiq Cavadlı saxlanılıb. Daha sonra digər jurnalistlər və fotoqraf Əhməd Muxtar da həbs olunub. Onların heç biri özünü təqsirli bilmir.