Ermənistan Baş naziri Nikol Paşinyan Azərbaycan Prezidenti İlham Əliyevin qəti tələbi əsasında ölkəsinin Konstitusiyasını dəyişməyə hazırlaşır.

Bu barədə erməni politoloq Harut Sasunyan məlumat verib. Onun sözlərinə görə, dəyişikliklər gələn il, yəni 2026-cı ildə həyata keçirilə bilər.

Politoloq bildirib ki, Bakı sülh prosesində bir sıra strateji məqsədlərinə nail olub və bu tələblərin icrası sülh müqaviləsinin imzalanması üçün əsas şərtlərdən biridir. Sasunyanın sözlərinə görə, Azərbaycan tərəfinin tələbləri aşağıdakılardır:
• Ermənistanda yeni Konstitusiyanın qəbul edilməsi;
• Ermənistanın beynəlxalq məhkəmələrdə Azərbaycana qarşı iddialarına son qoyması;
• ATƏT-in Minsk qrupunun buraxılması;
• ABŞ-nin Azərbaycana yardım qadağasının ləğvi;
• Avropa İttifaqı müşahidəçilərinin Ermənistandan çıxarılması;
• Azərbaycana Ermənistan ərazisindən maneəsiz keçidin təmin edilməsi (Zəngəzur dəhlizinin açılması).

Sasunyan qeyd edib ki, bu istiqamətdə irəliləyişlər əldə olunarsa, Ermənistan və Azərbaycan arasında sülhün bərqərar olması Paşinyanın gələn il keçiriləcək parlament seçkilərində növbəti qələbəsini təmin edə bilər.