Ev dustaqlığına alınmış Azərbaycan Prezident Administrasiyasının keçmiş rəhbəri Ramiz Mehdiyev ona qarşı irəli sürülmüş ittihamlar nəticəsində əmlaklarının müsadirə olunması riski ilə üzləşə bilər.

Açıq mənbələrə əsasən, Mehdiyevə aid edilən əmlak kifayət qədər böyükdür. Xüsusilə, Novxanıda üzüm bağları və Bakı, Abşeron və Goranboyda ümumilikdə 216 hektar kənd təsərrüfatı torpaqları – o cümlədən Novxanıda 155 hektar və Xınalıq kəndində 50 hektar torpaq sahəsi göstərilir.

Həmçinin Maştağa qəsəbəsində həyat yoldaşı Qalina Mehdiyevanın adına 892 sot, qızı Kamilə Əliyevanın adına isə 240 sot torpaq sahəsi qeyd olunur. Ailənin mülkiyyətində həmçinin gəlini Nigar Mehdiyevanın adına olan “Digital Media” MMC-də pay var. Bu şirkət 2008-ci ildə Bakıda qeydiyyatdan keçmiş “Media FM” radiosunun sahibidir.

Kamilə Əliyevaya Bakı şəhəri, İstiqlaliyyət küçəsi 11 ünvanında mənzil məxsusdur — bu ünvan həm də “İnfonet” MMC və “Caspian Telekom” MMC-nin hüquqi ünvanıdır. Mehdiyevə həmçinin Dilarə Əliyeva küçəsi 251A ünvanında yerləşən bir sıra obyektlər də aid edilir: “Topaz” və “Qala-R.L” mənzil-tikinti kooperativləri (MTK), “NLT” və “Premium Store” MMC-lər. Siyahıya həmçinin “NLT” MTK, “Servis”, “Grand Palace”, “Astoriya”, 2020-ci ildən “German Hospital” adlanan “Astoriya Tibb Mərkəzi” MMC və 2014-cü ildə açılmış, sahəsi 5 min kvadratmetrdən çox olan “Qrandezza” ticarət mərkəzi daxildir.

Mehdiyev ailəsi 50 milyon manat nizamnamə kapitalına malik “BTB” ASC bankının 75%-lik səhm paketini gəlini vasitəsilə nəzarətdə saxlayır. Bank “BTB Lizinq” ASC və “BTB Kapital İnvestisiya Şirkəti” ASC-nin təsisçisidir.

Bundan əlavə, Ramiz Mehdiyev Əhmədli qəsəbəsində yerləşən “Şərq-Qərb” nəşriyyatı ilə əlaqələndirilir. Nəşriyyatın ərazisində 408 mənzilli 16 mərtəbəli bina və yaxınlıqda daha bir 16 mərtəbəli bina inşa olunub. Əlaqəli şirkətlər sırasında “Şərq-Qərb Nəşriyyat Evi” MMC və “Qlobal East West” MMC göstərilir.

Ailəyə həmçinin “Sədərək” və “Binə” ticarət mərkəzlərində paylar, eləcə də bir neçə villa – Bakıda Tiflis prospektində yerləşən (36 sot, satış qiyməti 8 milyon dollar göstərilib), Qöyçay, Şamaxı və Göygöl rayonlarında villalar aid edilir.