Tofiq Yaqublu ilə bağlı Milli Şuranın bəyanatı.

Milli Şura Koordinasiya Mərkəzinin üzvü Tofiq Yaqublu 40 gündür aclıq aksiyası keçirir. Onu bu aksiyaya Azərbaycan hakimiyyəti özünün qanunsuz və ədalətsiz hərəkətləri ilə vadar edib.

Tofiq Yaqublu məhz siyasi sifarişlə, 4-cü dəfə şərlənərək həbs olunub. Aylarla davam edən məhkəmədə ona qarşı ittihamın yalan olduğu və onun günahsızlığı tutarlı dəlillərlə isbat edildiyi halda siyasi hakimiyyətin əlində repressiya vasitəsinə çevrilmiş məhkəmə Tofiq Yaqublunu 9 il müddətinə azadlıqdan məhrum edib. Tofiq Yaqublu da haqsız yerə həbs edilməsilə barışmayaraq, ədalətin bərpası - azad olunması tələbi ilə aclıq aksiyasına başlayıb.

Hazırda Tofiq Yaqublunun vəziyyəti son dərəcə ağırdır. Onun yaşı, yaşadığı həyat şəraiti, buna qədər 3 dəfə uzun müddətli həbsdə olması, aldığı fiziki və mənəvi tramvalar, səhhətindəki çoxsaylı və ciddi problemlər nəzərə alındıqda 40 günlük aclığın onu necə tükəndirdiyini təsəvvür etmək çətin deyil.
Yaxınları və əqidə dostları Tofiq Yaqubludan aclıq aksiyasını dayandırmağı dəfələrlə xahiş edib. Bugünlərdə ölkənin demokratik ictimaiyyətinin əhəmiyyətli hissəsi Tofiq Yaqublunun xilası üçün geniş tərkibdə müzakirə keçirdi və həmin toplantıda da Tofiq Yaqubluya aclığı dayandırmaq xahişi ilə müraciət olundu. Lakin Tofiq Yaqublu ömrünün sonrakı illərini haqsız yerə həbsxanada keçirmək istəmədiyini irəli sürərək aclıq aksiyasını dayandırmır.

Nə qədər acı və çətin olsa da, deməliyik ki, Tofiq Yaqublunun həyatı real təhlükə altındadır və biz hər an onu itirdiyimizin xəbərini ala bilərik. Belə bir vəziyyətdə hakimiyyətin ikiqat borcudur ki, nəhayət, məsuliyyətli davranıb, Tofiq Yaqublunun həyatını təhlükədən qurtarsın. Bunun da yolu Tofiq Yaqublunu təcili qaydada azadlığa buraxmaqdır.

Azərbaycan cəmiyyətinin bütün təbəqələri - ziyalılar, ictimaiyyət nümayəndələri, siyasətçilər, sənət adamları, şəhid ailələr və b. indiyədək hakimiyyətə Tofiq Yaqublunun xilası naminə müraciətlər edib. Tofiq Yaqublunun vəziyyəti eyni zamanda beynəlxalq birliyin, demokratik dünyanın da diqqətini cəlb edib və onlardan da hakimiyyətə Tofiq Yaqublunu xilas etmək üçün çağırışlar olub. Bu çağırışları nəzərə almamağa hakimiyyətin haqqı yoxdur.

Tofiq Yaqubluya qarşı bu qədər qəddarlıq aydındır ki, bilavasitə ölkə başçısı İlham Əliyevin ona olan kinli münasibətindən qaynaqlanır. Tofiq Yaqublunun ölümün bir addımlığında dayandığı indiki vaxtda da bütün aidiyyatı dövlət orqanlarının müfaviq addımlar üçün məhz İlham Əliyevin göstəriş və ya razılığını gözlədikləri də sirr deyil. Biz Demokratik Qüvvələrin Milli Şurası olaraq İlham Əliyevi məsuliyyət hissini axıra qədər itirməməyə, Tofiq Yaqublunun azad və xilas olunması üçün gərəkən addımı atmağa çağırırıq. İlham Əliyev unutmamalıdır ki, Tofiq Yaqublunun əsassiz şəkildə azadlıqdan məhrum edilməsi, bütün başqa siyasi sifarişli həbslər kimi, şəxsən onun və hakimiyyətinin üzərinə hüquqi, siyasi və mənəvi məsuliyyət qoyub. Bu məsuliyyətin ağırlığını artırmadan Tofiq Yaqublu (eləcə də bütün başqa siyasi məhbuslar) azadlığa buraxılmalıdır.

Milli Şura bir daha xatırladır ki, Tofiq Yaqublunu xilas etmək üçün qalan vaxt çox azdır. Buna görə də Azərbaycan hakimiyyəti, şəxsən İlham Əliyev daha artıq gözləməməlidir, üzərlərində ağır ittiham hökmü kimi qalacaq faciə baş vermədən Tofiq Yaqublunu azad etməlidir.
Azərbaycan cəmiyyəti də Tofiq Yaqublunun elə bu an azadlığa buraxılması tələbilə hakimiyyətə təzyiqi artırmalı, öz səsini daha ucadan və elliklə duyurmalıdır.
Milli Şura beynəlxalq birliyi, dünyanın demokratik güclərini də Tofiq Yaqublunun xilası naminə Azərbaycan hakimiyyəti ilə təcili qaydada daha effektiv və təsirli ünsiyyətə çağırır.