USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Tolikə qarşı məhbus ailələrinin şikayəti məhkəmə tərəfindən icraata götürülmədi
İyulun 10-da Nərimanov Rayon Məhkəməsində bloqer və şou-biznes siması kimi tanınan Tarix Əliyevə (Tolik) qarşı siyasi məhbus ailələrinin qaldırdığı şikayət üzrə məhkəmə prosesi keçirilib.
Məlumata görə, hakim Kamal Babayevin rəhbərlik etdiyi məhkəmə heyəti şikayətin icraata qəbul edilməsindən imtina edib. Səbəb kimi, məhkəməyə təqdim edilən videodiskdə Tarix Əliyevin təhqiramiz ifadələrinin yer aldığı hissənin silinməsi göstərilib.
Məhbus ailələrinin hüquqi müdafiəçisi vəkil Zibeydə Sadıqova video materialın hansı səbəbdən kəsildiyi məlum deyil və bu, müdafiə tərəfinin mövqeyini təqdim etməsini çətinləşdirib. O, məhkəməyə yenidən müraciət ediləcəyini bildirib.
78 məhbus ailəsi Tolikə qarşı iddiaya qoşulub
Hazırda həbsdə olan inanclı məhbus Bəxtiyar Babaşovun həyat yoldaşı, jurnalist Arzu Abdulla bildirib ki, Tarix Əliyevə qarşı şikayətçilərin sayı 78 nəfərə çatıb. Onun sözlərinə görə, Tolik “TikTok”da canlı yayım zamanı siyasi məhbus ailələrini təhqir edib və bu çıxış geniş ictimai qəzəb doğurub:
“Bu söhbət təkcə məhbus ailələrini deyil, bütün ləyaqətli insanları narahat edib. Biz hüquqi yollarla mübarizə aparmaqda qərarlıyıq. Tolik cəzalandırılmayınca dayanmayacağıq.”
Siyasi məhbusların ailələrindən bəyanat
Hadisədən sonra bir sıra siyasi məhbusların anaları birgə bəyanat yayaraq Tarix Əliyevin hakimiyyətin qeyri-rəsmi təbliğatçısı kimi çıxış etdiyini bildiriblər. Bəyanatda onun çıxışları “nifrət ritorikası” kimi qiymətləndirilib:
“Tolik iqtidarın mesajını cəmiyyətə ötürən fiqurdur. Onun siyasi məhbus ailələrinə qarşı çıxışı təsadüfi deyil. Bu, hakimiyyətin yönləndirdiyi və himayə etdiyi nifrət ritorikasının bir parçasıdır. Ona görə məsuliyyət təkcə Tolikdə deyil, bu ritorikanı mümkün edən siyasi mühitdədir.”
