Vəkillər Kollegiyasının üzvü ona qarşı böhtan iddiası qaldırıb

İşgəncələr Əleyhinə Araşdırma Mərkəzinin sədri Fikrət Cəfərli barəsində xüsusi ittiham qaydasında başlanmış cinayət işi üzrə təqsirləndirilən şəxs qismində tanınıb. Bu barədə məlumat Mərkəzin “Facebook” hesabında yayımlanıb.

İyulun 7-də Binəqədi Rayon Məhkəməsində hakim Zamiq Bağırovun sədrliyi ilə keçirilən hazırlıq iclasında vəkil Elvin Əliyevin şikayəti əsasında iddianın icraata götürülməsi barədə qərar verilib.

Elvin Əliyev Fikrət Cəfərlinin onun barəsində böhtan xarakterli məlumat yaydığını, bu səbəbdən işgüzar nüfuzuna xələl gəldiyini iddia edir. Vəkil hüquq müdafiəçisinin Cinayət Məcəlləsinin 147.1-ci maddəsi (böhtan) ilə məsuliyyətə cəlb olunmasını tələb edib.

İddiaya səbəb olan paylaşım Elvin Allahverdiyevin keçmiş vəkili ilə bağlı sosial şəbəkədə yayılmış şikayətlə bağlıdır. Həmin şikayətdə vəkilin məhkuma qarşı qeyri-peşəkar və hədələyici davranışlara yol verdiyi, ondan 10.500 manat almasına baxmayaraq vəd edilən hüquqi nəticəni təmin etmədiyi qeyd olunub. Məlumat İşgəncələr Əleyhinə Araşdırma Mərkəzinin sosial media səhifəsində jurnalist paylaşımına istinadla yayımlanıb.

Fikrət Cəfərli iddianı əsassız və siyasi sifarişli adlandırıb. O, bildirib ki, yayımlanan məzmun onun şəxsi mövqeyi deyil, jurnalistin paylaşdığı müraciətə istinaddır:

“Bu, məhbusun prezidentə ünvanladığı şikayətdir. Biz sadəcə jurnalistin paylaşdığı məlumatı istinadla paylaşmışıq. Bu halda niyə biz ittiham olunur və məhkəməyə verilirik?”

Hüquq müdafiəçisi hesab edir ki, Vəkillər Kollegiyasını tənqid etdiyinə görə cəzalandırılır:

“Məqsəd məni susdurmaq, İşgəncələr Əleyhinə Araşdırmalar Mərkəzini isə bağlatdırmaqdır.”

Hazırlıq iclasında dövlət hesabına təyin olunmuş müdafiəçi, Cəfərlinin mövqeyini bölüşməyib və məsələni məhkəmənin səlahiyyətinə buraxıb. Bu isə hüquq müdafiəçisinin narazılığına səbəb olub.

Məhkəmə baxışı 14 iyul tarixində keçiriləcək.

Qeyd edək ki, Cinayət Məcəlləsinin 147.1-ci maddəsi böhtan yaymağa görə cərimə, ictimai və islah işləri, eləcə də 6 aya qədər azadlıqdan məhrumetmə cəzası nəzərdə tutur.