Azərbaycanda 365-dən çox siyasi məhbus var: Anar Məmmədli və Anar Abdullayevin işi məhkəməyə göndərildi

Azərbaycanda hazırda 365-dən çox siyasi məhbusun olduğu bildirilir. Onlardan ikisi – Seçkilərin Monitorinqi və Demokratiyanın Tədrisi Mərkəzinin (SMDTM) rəhbəri Anar Məmmədli və ictimai fəal Anar Abdullayevin cinayət işi üzrə məhkəmə prosesi başlayır.

“Abzas Media”nın məlumatına görə, onların cinayət işi Bakı Ağır Cinayətlər Məhkəməsinə göndərilib və hakim Aygün Qurbanovanın icraatına verilib. Məhkəmənin hazırlıq iclası 26 may 2025-ci il tarixində keçiriləcək.

Anar Məmmədli ötən ilin aprelin 29-da saxlanılıb və ertəsi gün barəsində Xətai rayon Məhkəməsinin qərarı ilə həbs-qətimkan tədbiri seçilib. Ona qarşı əvvəlcə Cinayət Məcəlləsinin 206.3.2-ci maddəsi (qaçaqmalçılıq, əvvəlcədən əlbir olan bir qrup şəxs tərəfindən törədildikdə) ilə ittiham irəli sürülüb. Daha sonra bir neçə maliyyə cinayəti maddəsi də əlavə olunub.

İstintaqın son mərhələsində ictimai fəal Anar Abdullayev də bu iş üzrə təqsirləndirilən şəxs qismində cəlb olunub. O da eyni maddələrlə ittiham olunur və barəsində polisin nəzarətinə vermə qətimkan tədbiri seçilib.

Anar Məmmədli daha əvvəl, 2013-cü ildə də qanunsuz sahibkarlıq və digər maliyyə ittihamları ilə həbs olunmuş, 5 il 6 ay azadlıqdan məhrum edilmişdi. O, 2016-cı ildə Prezident İlham Əliyevin əfv sərəncamı ilə azadlığa buraxılmışdı. 2014-cü ildə isə Vaclav Havel adına mükafata layiq görülmüşdü.

2023-cü ilin noyabrından etibarən Azərbaycanda media və vətəndaş cəmiyyətinə qarşı təzyiqlərin yeni mərhələsi başlanıb. Hüquq müdafiəçilərinin məlumatına görə, bu dalğa nəticəsində çoxsaylı müstəqil jurnalist, hüquq müdafiəçisi və müxalif fəal saxta və siyasi motivli ittihamlarla həbs olunub.

Hazırda hüquq müdafiəçilərinin hesabatlarına əsasən, Azərbaycanda 365-dən çox siyasi məhbus var.