Azərbaycanda siyasi məhbusların sayı artmaqda davam edir. Sülh və Demokratiya İnstitutunun direktoru, hüquq müdafiəçisi Leyla Yunus “Abzas Media”ya açıqlamasında bildirib ki, əfv sərəncamları ilə bu problemin həlli mümkün deyil. Onun sözlərinə görə, son statistikalar da bunu sübut edir.

“Fevralın 12-də siyahımızda 357 nəfər vardı, indi isə 365 nəfər var. Bu tendensiya davam edir: 2-3 nəfəri buraxırlar, əvəzində 5-10 nəfəri həbs edirlər. Ona görə də siyasi məhbusların sayı azalmır, əksinə çoxalır. Yəni, əfvdən heç vaxt ciddi bir nəticə gözləmirik və indi də gözləmirik”, – deyə hüquq müdafiəçisi qeyd edib.

Hazırda yenilənməkdə olan siyasi məhbus siyahısında 365 nəfərin adı yer alır. Hüquq müdafiəçilərinin hesabatlarına əsasən, ölkədə 360-dan çox siyasi məhbus var.

Mayın 16-da Prezident yanında Əfv Məsələləri Komissiyasının bu il üçün sonuncu iclası keçirilib. Yeddi iclas ərzində 800-dən çox müraciətə baxılıb və müsbət rəy verilənlər ölkə Prezidentinə təqdim olunub. Sayca 71-ci əfv sərəncamının 28 May – Müstəqillik Günü ərəfəsində imzalanacağı gözlənilir.

Leyla Yunusun fikrincə, problemin əsaslı həlli üçün bütün siyasi məhbuslar azad olunmalı və siyasi sifarişlə keçirilən məhkəmələrə son qoyulmalıdır: “Ölkəmizdə qanun şah olmalıdır”, – deyə o əlavə edib.

Xatırladaq ki, bundan əvvəlki əfv sərəncamında siyasi məhbus kimi tanınan şəxslərin heç biri azadlığa buraxılmamışdı.