Respublika Prokurorluğunun sabiq baş müstəntiqi Müşviq Abbasov sosial şəbəkə hesabında AMEA-nın prezidenti, akademik İsa Həbibbəyli ilə bağlı iddia səsləndirib.

M.Abbasovun paylaşımında bildirilir ki, Nəqliyyat Nazirliyinin yaxınlığında yerləşən “Karvan” restoranının İsa Həbibbəyliyə məxsus olduğu iddia olunur. O qeyd edib ki, 2015-ci ildə sözügedən restoranda ofisiant işləyən gənc çılçırağın təmizlənməsi üçün tavana qaldırılıb və nəticədə yıxılaraq ağır xəsarət alıb, belinin sındığı bildirilib.

Sabiq müstəntiqin sözlərinə görə, həmin hadisə ilə bağlı İsa Həbibbəylinin qardaşı məhkəmə məsuliyyətinə cəlb olunub. Paylaşımda iddia edilir ki, zərərçəkmiş şəxs müalicə xərcləri üçün Həbibbəylilər tərəfindən ona maddi dəstək göstərilmədiyini dəfələrlə dilə gətirib. M.Abbasov həmin dövrdə İsa Həbibbəylinin AMEA-nın vitse-prezidenti olduğunu xatırladaraq, bunu təəccüblü hal kimi qiymətləndirib.

Paylaşımda, həmçinin qeyd olunur ki, hazırda AMEA-nın prezidenti olan İsa Həbibbəylinin fəaliyyəti ilə bağlı tənqidi fikirlər də mövcuddur.

Qeyd edək ki, səsləndirilən iddialarla bağlı İsa Həbibbəyli və ya aidiyyəti qurumlar tərəfindən rəsmi açıqlama verilməyib. Xəbərdə yer alan fikirlər sosial şəbəkə paylaşımına əsaslanır və qarşı tərəfin mövqeyi təqdim olunmağa hazırdır.