Rusiya Prezidenti Vladimir Putin ölkədə yanacaqla bağlı problemlərin davam etdiyini etiraf edib.

O, daxili bazarın yanacaqla təmin olunmasına həsr edilən müşavirədə bildirib ki, Rusiyanın iri neft emalı zavodlarının gücləri maksimum səviyyədə istifadə olunur.

Putinin sözlərinə görə, iyul ayında əsas yanacaq növlərinin istehsalı iyun ayı ilə müqayisədə daha yüksək olacaq. O qeyd edib ki, mövcud vəziyyətə baxmayaraq, benzinin ehtiyat həcmi ötən ilin eyni dövrü ilə müqayisədə demək olar ki, yaxın səviyyədədir.

Rusiya prezidentinin sözlərinə görə, ölkədə benzin ehtiyatı 1,7 milyon ton təşkil edir. Bu isə ötən ilin analoji dövrü ilə müqayisədə 4 faiz azdır.

Bununla belə, Putin yanacaq bazarında problemlərin qaldığını bildirib.

“Avtomobil sahibləri və biznes üçün problemlər davam edir. Təəssüf ki, yanacaqdoldurma məntəqələrində növbələr də var. Lazım olan benzin markasını hər zaman tapmaq olmur”, — deyə o vurğulayıb.

Məlumata görə, Rusiyada benzin istehsalı hazırda daxili tələbatın yalnız təxminən 80 faizini qarşılayır. Yanacaqla bağlı problemlər ölkənin 50-dən çox regionunda müşahidə olunur.

Bir sıra bölgələrdə şəxsi avtomobillər üçün yanacaq satışına müvəqqəti məhdudiyyətlər tətbiq edilib. Eyni problemlərin Rusiyanın işğal etdiyi Ukrayna ərazilərində də yaşandığı bildirilir.

Yanacaq böhranının əsas səbəblərindən biri Ukraynanın Rusiya neft emalı zavodlarına və neft bazalarına endirdiyi zərbələr hesab olunur. Son aylarda Rusiyanın mərkəzi hissəsində yerləşən bir sıra iri neft obyektləri fəaliyyətini azaltmağa və ya müvəqqəti dayandırmağa məcbur olub.