Türkiyənin əsas müxalifət qüvvəsi olan Cümhuriyyət Xalq Partiyasında böyük parçalanma baş verib. Özgür Özəl və onunla birlikdə 90 deputat CHP-dən istefa verərək Yeni Partiyanın yaradıldığını elan ediblər.

Özgür Özəl yeni siyasi təşkilatın təsis sənədlərini imzalayıb. Partiyanın yaradılması ilə bağlı ərizə Türkiyənin Daxili İşlər Nazirliyinə təqdim edilib. Yeni Partiyanın Qurucular Şurasına ümumilikdə 91 deputat daxil olub.

Təsis sənədlərini imzalayan Özgür Özəl yeni siyasi hərəkatın Türkiyə və xalq üçün xeyirli olmasını arzulayıb. Partiyanın adı və loqosu ictimaiyyətə təqdim edilib, Özəl sosial şəbəkə hesablarındakı məlumatları da yeniləyib.

Yeni Partiya ana müxalifət statusu qazanıb

Deputatların kütləvi istefasından sonra Türkiyə Böyük Millət Məclisində qüvvələr nisbəti dəyişib. Yeni Partiya 91 mandatla parlamentdə ikinci ən böyük siyasi qüvvəyə və ana müxalifət partiyasına çevrilib.

CHP-nin deputatlarının sayı isə 44-ə düşüb. Bununla da partiya parlamentdə ikinci böyük siyasi qüvvə statusunu itirib.

Yeni bölgüyə əsasən, hakim Ədalət və İnkişaf Partiyasının 277, Yeni Partiyanın 91, DEM Partiyanın 56, Milliyyətçi Hərəkat Partiyasının 46, CHP-nin isə 44 deputatı var.

CHP-də yeni rəhbərlik formalaşdırılacaq

Deputatların böyük hissəsinin partiyadan ayrılması CHP-nin parlament rəhbərliyində də dəyişikliklərə səbəb olacaq. Partiyanın deputat sayının azalması ilə qrup rəhbərliyinin yenidən formalaşdırılması gözlənilir.

Kemal Kılıçdaroğlunun deputat olmaması səbəbindən CHP parlament qrupuna yeni sədr seçilməlidir. Bu vəzifə üçün müxtəlif namizədlərin adları müzakirə olunur.

CHP-də qalan deputatların vahid siyasi mövqedə olmadığı, onların arasında Kılıçdaroğlu tərəfdarları ilə yanaşı, partiya daxilində mübarizəni davam etdirməyi düşünən siyasətçilərin də olduğu bildirilir.

Parlament komissiyalarında bölgü dəyişəcək

Yeni Partiyanın parlamentdə ana müxalifət statusu əldə etməsi komissiyalardakı təmsilçiliyə də təsir göstərəcək. CHP-nin komissiyalardakı yerlərinin azalacağı, həmin yerlərin böyük hissəsinin Yeni Partiyaya keçəcəyi gözlənilir.

Yeni siyasi təşkilatın parlament qrupu və rəhbər orqanlarının qısa müddətdə formalaşdırılması nəzərdə tutulur.

Özgür Özəlin təsis sənədlərini imzalayarkən CHP nişanını çıxarıb Türkiyə bayrağı nişanı taxması da diqqət çəkib. Görüntülərin arxa planında Mustafa Kamal Atatürkün portreti və “Hakimiyyət qeyd-şərtsiz millətindir” ifadəsi yer alıb.

Deputatların CHP-dən istefaları elektron sistem vasitəsilə rəsmiləşdirilib. Hüquqi prosedurlar tamamlandıqdan sonra onlar parlamentdə fəaliyyətlərini Yeni Partiyanın deputatları kimi davam etdirəcəklər.