Avqustun 29-da Ağır Cinayətlər Məhkəməsində narkotiklə bağlı cinayətlərdə ittiham olunan Azərbaycan Xalq Cəbhəsi Partiyasının (AXCP) üzvü, birinci qrup əlil Famil Xəlilovun işi üzrə məhkəmə prosesi başlayacaq.


Müttəhimin vəkili Fəxrəddin Mehdiyevin verdiyi məlumata görə, bir müddət əvvəl müdafiə tərəfi istintaq zamanı Xəlilovun təqsiri olmadığına və ittihamlar saxta olduğuna görə onun azad edilməsi haqqında vəsatət qaldırıb. Bu vəsatət təmin edilməyib. İstintaqın məlumatına görə, polis Xəlilovun evində 14 qram narkotik tərkibli metamfetamin maddəsi aşkar edib. Xəlilov onun evinə narkotiki polis əməkdaşlarının atdığını iddia edir. Mehdiyev bildirib ki, Xəlilov CM-in 234.4.3-cü (külli miqdarda narkotik vasitənin satış məqsədilə istehsalı, daşınması, saxlanması) maddəsi ilə ittiham olunur. Xəlilovun ailəsi və AXCP onun siyasi əqidəsinə görə təqib olunduğunu iddia edir. İrəli sürülən ittihamlara görə 5 ildən 10 ilədək azadlıqdan məhrumetmə cəzası nəzərdə tutulur.

Vəkil F.Mehdiyev bildirib ki, avqustun 29-da birinci məhkəmə iclasında müdafiə tərəfi yenidən cinayət tərkibi olmadığına görə Xəlilovun həbsdən dərhal azad edilməsi haqqında vəsatət qaldırmağı planlaşdırır. Vəsatət təmin edilməsə müdafiə tərəfi Xəlilovun birinci qrup əlil olması, hər iki qolunun iflic olması və sanitariya-gigiyena ehtiyaclarını özünün qarşılaya bilməməsi nəzərə alınmaqla, onun barəsində ev dustaqlığı qətimkan tədbirinin seçilməsi haqqında vəsatət verəcək.

Avqustun 15-dən etibarən Xəlilov öz-özünə qulluq edə bilmədiyi üçün istintaq təcridxanasında ona yardım göstərilməsi, xüsusən 1 saylı Kürdəxanı istintaq təcridxanasında tibbi yardım göstərilməsi tələbi ilə aclıq aksiyası keçirir. Xəlilov həmçinin əsassız həbsə son qoyulmasını tələb edir. O, aclıq aksiyası haqqında rəsmi bildirişi avqustun 15-də yazıb.

Avqustun 21-də Xəlilova baş çəkən həyat yoldaşı Kiçikxanım Xəlilova Turan Agentliyinə onun vəziyyətinin ağır olduğunu, tualet ehtiyaclarını qarşılamaq üçün özü soyuna bilmədiyini və soyunmuş və çılpaq halda qayıtdığını bildirib.

“Ona heç kim kömək etmir, o, öz ehtiyaclarını özü qarşılaya bilmir. Mən həftədə iki dəfə istintaq təcridxanasında ona baş çəkirəm, onu yuyuram, çimdirirəm, tualetdən istifadə etməsinə kömək edirəm. Qalan günlərdə o, tualetdən istifadə etməmək üçün maye qəbulunu məhdudlaşdırır. Aclığı dayandırmasında israr edən istintaq təcridxanasının rəisi Elnur İsmayılovun təzyiqlərinə baxmayaraq, o, yemək yemir”, deyə Kiçikxanım Xəlilova bildirib.

O, həmçinin Bakı yaxınlığında kirayə ev tutduqları üçün ailəsinin maliyyə vəziyyətinin ağır olmasından danışıb. Ailədə üç azyaşlı uşaq var, onların biri anadangəlmə xəstədir. Xalq Cəbhəsi Partiyası Xəlilovlar ailəsinə kömək edir.

AXCP sədri Əli Kərimli partiya üzvü Famil Xəlilovun ailəsinə baş çəkib. “Azərbaycan hakimiyyəti Famil Xəlilova qarşı bu qeyri-insani davranışa və qəddarlığa son qoymalıdır. Biz xalq olaraq bütün hakimiyyətdən bu qeyri-insani təqibə son qoyulmasını və Famil Xəlilovun azad edilməsini tələb etməliyik”, deyə Kərimli öz Facebook səhifəsində yazıb.

Saxlanılan Famil Xəlilovun vəziyyəti həkimlərin nəzarəti altındadır, o, yemək yeyir, bu barədə Turan Agentliyinə Azərbaycan Penitensiar Xidmətinin ictimaiyyətlə əlaqələr İdarəsinin rəisi Tanrıverdi Mustafayev bildirib.

“Hazırda F.Xəlilov istintaq təcridxanasının tibb hissəsində saxlanılır. Zərurət olduqda təkcə F.Xəlilova deyil, bütün saxlanılanlara və məhbuslara tibbi yardım göstərilir”, deyə T.Mustafayev bildirib.