Sosial şəbəkələrdə İranın ali rəhbərinin müşaviri və Ali Təhlükəsizlik Şurasının keçmiş katibi Əli Şəmxaninin qızının toyundan görüntülər yenidən yayılıb.

Kadrlarda əks olunan mərasim ictimaiyyətdə geniş müzakirələrə və tənqid dalğasına səbəb olub.

Məlumata görə, həmin nikah mərasimi ötən il Tehranın lüks “Espinas Palas” otelində baş tutub. O zaman “Arman Melli” qəzeti bu barədə “Espinas Persian otelində toy qalmaqalı” başlıqlı məqalə dərc etmişdi.

Qəzetin məlumatına əsasən, mərasimin xərci təxminən 1 milyard 400 milyon tümən (təxminən 14 700 ABŞ dolları) təşkil edib. Məqalə müəllifi yazırdı ki, ölkədə iqtisadi sanksiyalar və yüksək inflyasiya fonunda belə bir dəbdəbənin nümayişi, sadə vətəndaşlardan “səbir və təmkin” gözləyən hakimiyyət üçün ictimai etiraz doğurur.

Son günlər yayılan yeni videolar İran cəmiyyətində sosial bərabərsizlik, korrupsiya və elita təbəqəsinin həyat tərzi mövzularında mübahisələri yenidən alovlandırıb.