Oktyabrın 13-də Bakı Ağır Cinayətlər Məhkəməsində “Toplum TV işi” üzrə növbəti məhkəmə prosesi keçirilib. Hakim Azər Tağıyevin sədrliyi ilə baş tutan iclasda təqsirləndirilənlərdən “Toplum TV”-nin həmtəsisçisi, media eksperti Ələsgər Məmmədli ifadəsini davam etdirib.

Ə.Məmmədli çıxışında 2024-cü il martın 8-də saxlanıldığı günü xatırladaraq bildirib ki, evində qanuni vəkilinin iştirakı olmadan reyd keçirilib və pulun atılması ilə saxta sübut yaradılıb:

“Polis bir bağlama pulu ayaqqabı qutusuna ataraq, guya ‘evimdən tapılıb’ görüntüsü formalaşdırıb. Bu, açıq şəkildə Konstitusiyanın və Cinayət Prosessual Məcəlləsinin tələblərinin pozulmasıdır”.

Ekspert həmçinin qeyd edib ki, istintaq onun xarici səfərlərini “qaçaqmalçılıq” sübutu kimi təqdim edib:

“Mən 12 il xaricdə yaşamış, beynəlxalq təşkilatlarla əməkdaşlıq etmişəm. İstintaq 2016-cı ildən sonrakı səfərlərimi sübut kimi təqdim etməklə, iddiasının əsassız olduğunu bir daha göstərib”.

Ə.Məmmədli əlavə edib ki, istintaqın sübut kimi təqdim etdiyi bank kartlarından biri 27 il əvvəl etibarlılığını itirib, digəri isə Tbilisi metrosunun ödəniş kartıdır:

“Bu metro kartıdır, arxasında metro sxemi də var. İstintaq bunu ‘bank kartı’ kimi sənədləşdirib. Bu, savadsızlıq və saxtalaşdırmadır”.

Ələsgər Məmmədli çıxışının sonunda işi “tam saxta” adlandırıb və bunu “vətəndaş cəmiyyətinin və azad medianın siyasi motivlərlə susdurulması” kimi qiymətləndirib.

Prosesdə daha sonra Demokratik Təşəbbüslər İnstitutunun əməkdaşı Ramil Babayev ifadə verib. O, saxlanıldığı gün polis tərəfindən təzyiqə məruz qaldığını və evinə pul atıldığını deyib:

“Qanunsuz axtarış zamanı video çəkiliş aparılsa da, polis sonradan həmin görüntünü sildi. Mən bu etiraza görə özümə xəsarət yetirdim, bıçaqla qarnımı kəsdim”.

R.Babayev bildirib ki, saxlanıldığı ilk 6 saat ərzində işgəncə hədələri, psixoloji təzyiq və insanlıqdan kənar davranışlarla üzləşib:

“Müharibə əsirlərinə belə davranmırlar”.

“Toplum TV işi” üzrə ümumilikdə 10 nəfərə qarşı cinayət işi açılıb. Onların arasında III Respublika Platformasının spikeri Akif Qurbanov, qurumun üzvü Ruslan İzzətli, “Toplum TV”-nin həmtəsisçisi Ələsgər Məmmədli, jurnalistlər Müşfiq Cabbar, Fərid İsmayılov, həmçinin Əli Zeynal, İlkin Əmrahov və Ramil Babayev var.

Jurnalist Elmir Abbasov polis nəzarətinə verilib, “Toplum TV” redaktoru Şahnaz Bəylərqızı isə ev dustaqlığından sonra polis nəzarətinə buraxılıb.

İttiham olunanlar siyasi sifarişlə həbs olunduqlarını bildirir və irəli sürülən qaçaqmalçılıq və digər ittihamları rədd edirlər.