Azərbaycanda bir sıra qeyri-hökumət təşkilatlarının (QHT) vəzifəli şəxsləri qanunsuz olaraq orden və medallar hazırlayıb təqdim etdiklərinə görə cinayət məsuliyyətinə cəlb olunublar.

Baş Prokurorluğun Mətbuat xidmətindən verilən məlumata görə, bəzi QHT-lər tərəfindən müxtəlif adda orden və medalların qanunsuz təsis edilməsi və bu “təltiflərin” ayrı-ayrı şəxslərə təqdim olunması faktları ilə bağlı Baş prokuror yanında Korrupsiyaya qarşı Mübarizə Baş İdarəsində cinayət işi başlanıb və istintaq aparılır.

İstintaq zamanı müəyyən edilib ki, bir sıra ictimai birlik və fondların — “Azərbaycan Qarabağ Müharibəsi Əlilləri, Veteranları və Şəhid Ailələri”, “Azərbaycan Vətən Müharibəsi Veteranları”, “Şəhid Ailələri, Əlilləri və Müharibə Veteranlarının Müdafiəsi”, “Azərbaycan Respublikası Müharibə, Əmək və Silahlı Qüvvələr Veteranları Təşkilatı”, “Qarabağ Əlillərinə Qayğı”, “Sabitlik və İnkişaf Mərkəzi” İctimai Birlikləri, eləcə də “Beynəlmiləlçi Əlil Döyüşçülər” və “Dədə Qorqud Xeyriyyə” Fondlarının vəzifəli şəxsləri qanunsuz fəaliyyət göstəriblər.

Araşdırmalara görə, həmin şəxslər öz vəzifə səlahiyyətlərini aşaraq dövlətin səlahiyyətlərinə daxil olan təltifetmə prosedurunu mənimsəyib, müxtəlif adda orden, medal və döş nişanları təsis ediblər. Onlar bu “mükafatları” şəxsi münasibətlərə və ya maddi maraqlara əsaslanaraq, bəzən isə müəyyən məbləğdə pul qarşılığında çoxsaylı şəxslərə təqdim ediblər.

İstintaq çərçivəsində aparılan axtarışlar zamanı 1 518 ədəd orden və medal, 777 ədəd vəsiqə, 7 kitabça, həmçinin 8 069 nəfərə təltiflərin təqdim edilməsinə dair qeydlər və digər maddi sübutlar götürülüb.

Toplanmış sübutlar əsasında “Beynəlmiləlçi Əlil Döyüşçülər” Fondunun sədri Səyyaf Orucov, “Azərbaycan Qarabağ Müharibəsi Əlilləri, Veteranları və Şəhid Ailələri” İctimai Birliyinin sədri Mehdi Mehdiyev və “Azərbaycan Vətən Müharibəsi Veteranları” İctimai Birliyinin sədri Füzuli Rzaquliyev barəsində Cinayət Məcəlləsinin 309.1-ci maddəsi (vəzifə səlahiyyətlərini aşma) ilə ittiham irəli sürülüb. Onlar barəsində polisin nəzarəti altına vermə qətimkan tədbiri seçilib.

Hazırda eyni xarakterli faktlarla bağlı istintaq və prosessual hərəkətlər davam etdirilir. Baş Prokurorluq bildirir ki, qanunsuz fəaliyyətə yol vermiş digər QHT rəhbərlərinin də ifşa olunması istiqamətində tədbirlər görülür.

Qanun pozuntularının qarşısını almaq, səbəb və şəraitləri aradan qaldırmaq məqsədilə prokuror nəzarəti və təsir tədbirləri həyata keçirilir.

İbtidai istintaq davam edir.