Hökumətyönlü mediada Ramiz Mehdiyevlə bağlı yayımlanan növbəti material ciddi müzakirələrə səbəb olub. İrihəcmli yazıda sabiq Prezident Administrasiyası rəhbərinin siyasi fəaliyyəti və onunla əlaqəli şəxslər barədə iddialar səsləndirilib.

Məqalədə qeyd olunur ki, Ramiz Mehdiyevdən “dövlət adamı” obrazı yaratmağa çalışan və onu “atası” adlandıran deputat Zahid Oruc, eləcə də onu “böyük şəxsiyyət” kimi təqdim edən bəzi digər siyasətçilər keçmiş administrasiya rəhbərinə yaxın şəxslər kimi göstəriliblər.

Yazıda bu şəxslərə ünvanlanan xəbərdarlıq diqqət çəkib: “Ramiz Mehdiyevdən ‘dövlət adamı’ obrazı düzəltməyə çalışan və onu ‘atası’ adlandıran Zahid Oruc, Mehdiyevi ‘böyük şəxsiyyət’ hesab edən Məlahət İbrahimqızı və digər deputatlar, ayrı-ayrı orqanlarda oturanlar bilməlidirlər ki, nankorluğun, xəyanətin sonu acınacaqlı olur.”

Bu ifadələr mediada Zahid Orucun siyasi karyerasına qarşı “vurulma anonsu” kimi dəyərləndirilib. Analitiklər hesab edirlər ki, hakimiyyətə yaxın mətbuatın bu cür yazılar dərc etməsi, adətən, müəyyən dairələrdə siyasi münasibətlərin dəyişməsinə işarə sayılır.

Məsələ ilə bağlı deputat Zahid Oruc açıqlama verərək iddiaları rədd edib. O bildirib ki, heç kəsi “ata” saymır və Ramiz Mehdiyevlə şəxsi münasibətləri barədə deyilənlər həqiqətə uyğun deyil: “Kimisə atalıqda görməmişik, hər kəsin öz yeri və məsuliyyəti var.”

Xatırladaq ki, bir müddətdir Ramiz Mehdiyev barəsində dövlətə xəyanət, vəzifə səlahiyyətlərindən sui-istifadə və digər ağır ittihamlarla bağlı iddialar mediada yer alır. Onunla əlaqəli bir sıra şəxslərin də bu proses çərçivəsində diqqət mərkəzinə düşdüyü bildirilir.