Sabiq milli təhlükəsizlik naziri Eldar Mahmudovun həbsi gündəmdədir.

Bu barədə məlumatı jurnalist Cavanşir Həsənli sosial şəbəkədə paylaşıb. O, İspaniyanın “Diario de Mallorca” nəşrinə istinadən bildirib ki, Azərbaycan Baş Prokurorluğu Palma şəhər məhkəməsi və Balear adalarının Korrupsiyaya qarşı Prokurorluğuna Mahmudovlar ailəsi ilə bağlı məktub göndərib.

Paylaşımda qeyd olunur ki, Eldar Mahmudov və digər şəxslər barəsində ayrıca cinayət işi aparılır. Bu iş 2018-ci ildə ləğv edilmiş Milli Təhlükəsizlik Nazirliyinin vəzifəliləri ilə bağlı istintaqdan ayrı aparılır.

Məlumata görə, dövlət büdcəsindən mənimsənildiyi iddia edilən 29,6 milyon avro əvvəlcə Latviyadakı banka köçürülüb. Hesab Dominikan Respublikasında qeydiyyatdan keçmiş “Prime Design and Patenting SA” adlı offşor şirkətə məxsus olub. Şirkətin sahibi Sahib Əli oğlu Ağayev Eldar Mahmudovun yaxın adamı kimi göstərilir.

2014–2015-ci illərdə həmin vəsaitlərin bir hissəsinin Anar Mahmudovun nəzarətində olan digər offşor hesablara köçürüldüyü bildirilir.

Sahib Ağayev 2018-ci ildə Bakı Ağır Cinayətlər Məhkəməsində korrupsiya ittihamı ilə mühakimə olunub və 2020-ci il iyunun 16-da məhkum edilib. Eldar Mahmudovun digər qohumu və yaxın əməkdaşı da 10 milyondan çox manat dövlət vəsaitinin mənimsənilməsi ittihamı ilə məhkum olunub.

Baş Prokurorluğun məlumatına əsasən, Anar Mahmudovun əldə etdiyi 29,6 milyon avro daha sonra onun və yaxın ailə üzvlərinin İspaniya, Lüksemburq, İsveçrə və digər ölkələrdəki hesablarına köçürülüb. Bu vəsaitlərin daşınar və daşınmaz əmlakların alınmasına sərf olunduğu qeyd olunur.

Komissiya roqatoriyası çərçivəsində əldə edilmiş sənədlərə görə, Mahmudovlar ailəsinin Azərbaycanda və Avropanın bir sıra ölkələrində – İspaniya, Almaniya, Böyük Britaniya, Lüksemburq və İtaliyada ümumilikdə 100 milyon avrodan artıq dəyəri olan əmlaklara sahib olduqları göstərilib.

Baş Prokurorluq əlavə edib ki, bu aktivlərin hamısı Eldar Mahmudovun nazir təyin olunmasından sonra, onun həyat yoldaşı və övladlarının adına rəsmiləşdirilib. Qurumun məlumatına görə, həmin dövrə qədər ailənin əhəmiyyətli gəliri olmayıb.