USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Həbsdə olan jurnalist Ülviyyə Əliyə anası ilə görüşməyə icazə verilməyib
“Meydan TV işi” üzrə həbsdə saxlanılan jurnalist Ülviyyə Əliyə (Quliyeva) anası ilə görüşməyə icazə verilməyib. Bu barədə jurnalistin anası İlhamə Mehmanlı Meydan TV-yə məlumat verib.
İlhamə Mehmanlının sözlərinə görə, bu gün qızının ad günü münasibətilə Bakı İstintaq Təcridxanasına gedib, lakin görüş baş tutmayıb.
“Səhər Ülviyyənin ad gününə görə böyük tort alıb, Kürdəxanıya aparmışdım. Təcridxananın rəisi Elnur İsmayılov mənimlə görüşmədi, müavini Əhəd Abıyev dedi ki, görüşə icazə yoxdur. Etiraz etdim ki, Elnur İsmayılov söz verib, indi niyə üstündə durmur, amma cavab verən olmadı”, – deyə İlhamə Mehmanlı bildirib.
Anası əlavə edib ki, görüşə bilməsə də, bu gün qızı ilə telefonla danışa bilib: “Qızım Ülviyyə zəng etdi, dedi ki, yaxşıyam, narahat olma, onlara gülərək qalib gələcəyik.”
Jurnalist Ülviyyə Əli (Quliyeva) 2024-cü il mayın 7-də “Meydan TV işi” ilə bağlı cinayət təhqiqatı çərçivəsində həbs edilib.
Əvvəlcə ona qarşı Cinayət Məcəlləsinin 206.3.2-ci maddəsi (qaçaqmalçılıq, əvvəlcədən əlbir olan bir qrup şəxs tərəfindən törədildikdə) ilə ittiham irəli sürülüb. 2025-ci il avqustun 28-də isə bu iş üzrə ittihamlar ağırlaşdırılıb.
Hazırda “Meydan TV işi” üzrə 12 nəfər bir neçə maddə —
192.3.2 (xüsusilə küllü miqdarda gəlir əldə etməklə qanunsuz sahibkarlıq),
193-1.3.1 və 193-1.3.2 (cinayət yolu ilə əldə edilmiş əmlakı leqallaşdırma),
206.4 (mütəşəkkil dəstə tərəfindən qaçaqmalçılıq),
213.2.1 (vergiləri ödəməkdən yayınma),
320.1 və 320.2 (sənəd saxtalaşdırma və saxta sənədlərdən istifadə etmə) maddələri ilə ittiham olunurlar.
