Bəxtiyar Hacıyev: “Bundan sonra qəfəsdə oturub kitab oxuyacam”

Sentyabrın 25-də Bakı Ağır Cinayətlər Məhkəməsində ictimai fəal Bəxtiyar Hacıyevin məhkəməsi davam edib. Bu iş hakim Əli Məmmədovun icraatındadır.

Məhkəmə sənədlərin tədqiqi mərhələsindədir. Proses başlayan kimi Bəxtiyar Hacıyev dövlət ittihamçısı Eldar Həmzəyə etiraz edib. O, etirazını belə əsaslandırıb ki, dövlət ittihamçısı məhkəmə iclaslarında Cinayət Prosessual Məcəlləsinin qaydalarını pozub. İctimai fəal ikinci səbəb kimi ABŞ Dövlət Departamentinin Azərbaycana qarşı tərtib etdiyi sanksiya siyahısında Eldar Həmzənin də yer almasını göstərib. Vəkil Aqil Layıc etirazı dəstəkləyib.

Prokurorsa bildirib ki, onun adı sanksiya siyahısına erməni hərbçilərinin məhkəməsinə görə düşüb: “Okeanın o tayında verilən qərar mənə maraqlı deyil, mənim üçün ən vacibi Azərbaycan qanunlarıdır. Etiraz üçün əsas görmürəm”.

Hakim qısa müşavirədən sonra etirazı təmin etməyib.

Bəxtiyar Hacıyev məhkəməni qərəzli adlandıraraq növbəti məhkəmə iclaslarında iştirakdan imtina etməklə bağlı vəsatət verib:

“Hakimlər müşavirəyə gedir, prokuror da durub qaça-qaça müşavirə otağına gedir, hakimlərlə söhbət edir, birlikdə siqaret çəkirlər. Ancaq mən hakimə bir kəlmə söz deyə bilmirəm, iclas bitən kimi mənə tərəf baxmadan zaldan çıxır. Halbuki, bu, qanuna ziddir, prokuror tərəf olmamalıdır. Elə buna görə də bu məhkəmədən ədalət gözləmirəm. Mənim iştirakım olmadan nə istəyirsiz edin, hansı qərarı istəyirsiz verin”.

Prokuror vəsatətə münasibət bildirərkən deyib ki, təqsirləndirilən şəxslərin məhkəməyə gəlib-gəlməməsi onların iradəsi ilə yox, Cinayət-Prosessual Məcəlləsinə uyğun olaraq təmin edilir. O, vəsatətin təmin olunmamasını istəyib. Hakim bu vəsatəti də təmin etməyib. Bəxtiyar Hacıyev bildirib ki, bundan sonra məhkəməyə gətirilsə də, heç nəyə münasibət bildirməyəcək, vəsatətlər verməyəcək, qəfəsdə oturub kitab oxuyacaq.

Bəxtiyar Hacıyev məhkəməyə gəlməyəcəyini hələ ötən məhkəmə iclasında bəyan etmişdi. Həmin məhkəmə iclasında bu iş üzrə zərərçəkmiş kimi tanınan Ülviyyə Alovlu ilə Bəxtiyar Hacıyev arasında Yasamal Rayon Məhkəməsində baş vermiş insidentlə bağlı videogörüntülərə baxış keçirilmişdi. Bu zaman insidenti əks etdirən əsas məqamların silindiyi məlum olmuşdu. Bəxtiyar Hacıyev bildirmişdi ki, videogörüntünün onun həbsinə birbaşa aidiyyəti olan hissə qəsdən silinib. İclasın bu yerində müttəhimlə prokuror arasında mübahisə yaranmışdı, prokuror onun məhkəmə zalından çıxarılmasını istəmişdi. Bəxtiyar Hacıyevsə məhkəməni qərəzli adlandıraraq iştirakdan şifahi imtina etmişdi. Bu günsə o, iclasda iştirakdan imtinanı vəsatət şəklində təqdim edib.

Vəsatətlərlə bağlı hakimin qərarları elan olunduqdan sonra hakim sənədlərin elanını davam etdirib.

Məhkəmə iclası oktyabrın 11-nə təyin edilib.

Bəxtiyar Hacıyev 2022-ci ilin dekabrında həbs olunub. O zaman ona qarşı Cinayət Məcəlləsinin 221.2.2-ci (ictimai qaydanın qorunması üzrə vəzifəni yerinə yetirən şəxsə qarşı müqavimət göstərməklə xuliqanlıq) və 289.1-ci (məhkəməyə hörmətsizlik) maddələrilə ittiham irəli sürülüb. Onunla Ülviyyə Alovlu (Muradova) arasında Yasamal Rayon Məhkəməsində insident baş verdiyi iddia olunur. İttihama görə, Bəxtiyar Hacıyev həmin insident zamanı icra məmuru Orxan Abdullayevə də zorakılıq tətbiq edib.

Ötən il iyunun 16-da fəala qarşı yeni ittihamlar irəli sürülüb. Bu ittihamlar əsasən maliyyə məsələlərilə - ayrılan qrantların təyinatı üzrə xərclənməməsilə bağlıdır.

Ona həmçinin Cinayət Məcəlləsinin 192-ci (qanunsuz sahibkarlıq), 193-1-ci (cinayət yoluyla əldə edilmiş əmlakı leqallaşdırma), 206-cı (qaçaqmalçılıq), 320-ci (saxta sənədlərdən istifadə) maddələrilə ittiham verilib.

Həmin ilin noyabrında isə Bəxtiyar Hacıyevə daha bir ittiham verilib. Ona Cinayət Məcəlləsinin 213.1-ci (vergidən yayınma) maddəsilə daha bir ittiham irəli sürülüb.