Azərbaycanın İnsan Hüquqları üzrə Müvəkkili (Ombudsman) Səbinə Əliyeva “Amnesty International” beynəlxalq insan hüquqları təşkilatının baş katibi Aqnes Kallamarda etiraz məktubu ünvanlayıb. Etiraz məktubunda təşkilatın 2024-cü ildə dünyada insan hüquqlarının vəziyyətinə dair dərc etdiyi hesabatda Azərbaycanla bağlı yer alan məlumatların “həqiqəti əks etdirmədiyi, birtərəfli və qərəzli” olduğu bildirilib.

Ombudsman hesab edir ki, bu cür yanaşma “Amnesty International”ın insan hüquqları sahəsində obyektivlik və ədalət prinsiplərindən uzaq olduğunu bir daha nümayiş etdirir. Lakin məktubun mətnində hesabatda konkret olaraq hansı məlumatların saxtalaşdırıldığı və ya qərəzli təqdim edildiyi açıqlanmayıb.

Səbinə Əliyeva qeyd edib ki, “Amnesty International”ın tənqidinə baxmayaraq, 2024-cü ilin noyabrında Bakıda keçirilmiş BMT-nin İqlim Dəyişikliyi Konfransı geniş təmsilçiliyi və inklüzivliyi ilə seçilib, vətəndaş cəmiyyəti nümayəndələrinin də fəal iştirakı üçün şərait yaradılıb.

Ombudsman həmçinin təşkilatı Azərbaycan-Ermənistan münaqişəsi zamanı azərbaycanlı qaçqınlar, məcburi köçkünlər və itkin düşən şəxslərlə bağlı məsələlərə, eləcə də Ermənistanın “mina terroruna” diqqət yetirmədiyinə görə sərt tənqid edib.

Əliyeva beynəlxalq qeyri-hökumət təşkilatlarını insan hüquqları ilə bağlı hesabatlar hazırlayarkən beynəlxalq hüququn tanınmış prinsiplərinə riayət etməyə, obyektiv və təsdiqlənmiş faktlara əsaslanmağa çağırıb.