Martın 11-də **Bakı Ağır Cinayətlər Məhkəməsi**ndə “QHT işi” üzrə həbsdə olan sosial işçi **Zamin Zəki**nin sonuncu məhkəmə prosesi keçirilib.

APA-nın xəbərinə görə, hakim **Elmin Rüstəmov**un sədrliyi ilə keçirilən prosesdə Zamin Zəki 7 il 6 ay müddətinə azadlıqdan məhrum edilib. Bundan əvvəl dövlət ittihamçısı onun 8 il həbs cəzası almasını təklif etmişdi.

Zamin Zəki **Azərbaycan Respublikasının Cinayət Məcəlləsi**nin aşağıdakı maddələri ilə ittiham olunurdu:
• 313-cü maddə – vəzifə saxtakarlığı
• 193-1.3.2-ci maddə – cinayət yolu ilə əldə edilmiş pul vəsaitlərinin leqallaşdırılması (xeyli miqdarda)
• 308.1-ci maddə – vəzifə səlahiyyətlərindən sui-istifadə

Cinayət işinin materiallarına görə, Z.Zəki xarici təşkilatlardan aldığı qrant vəsaitlərini qanunvericiliyə uyğun şəkildə qeydiyyatdan keçirməyib. Sosial işçi isə özünü təqsirli bilmədiyini və ictimai fəaliyyətinə görə cəzalandırıldığını bildirir.

Zamin Zəki 2025-ci ilin aprelində həbs olunub. “QHT işi” üzrə həbslər isə 2025-ci ilin martında başlayıb. Bu iş çərçivəsində Bəşir Süleymanlı, Məmməd Alpay və Hafiz Həsənov saxlanılıb. Hafiz Həsənov sonradan ev dustaqlığına buraxılıb.

Daha sonra ictimai fəal Asəf Əhmədov, sosial işçi Zamin Zəki və Əhməd Məmmədzadə də eyni ittihamlarla həbs olunublar.

İş üzrə istintaqa 100-dən çox şəxsin, o cümlədən beynəlxalq donor təşkilatlarının əməkdaşlarının və bəzi QHT rəhbərlərinin cəlb edildiyi bildirilir.