Hədə-qorxu ilə pul tələb etmədə təqsirləndirilən “Bəniz” ləqəbli tiktoker Aybəniz Xəlilovanın cinayət işi üzrə məhkəmənin növbəti prosesi keçirilib.

İşə Bakı Ağır Cinayətlər Məhkəməsində hakim Fəxri Məmmədovun sədrliyi ilə baxılıb. İclasda iş üzrə zərərçəkmiş Xalid Kərimovun ibtidai istintaq zamanı verdiyi ifadə elan edilib.

İfadəyə görə, X.Kərimov Aybəniz Xəlilova ilə 2023-cü ildə sosial şəbəkə vasitəsilə tanış olub. O bildirib ki, 2024-cü ildə aralarında əlaqə yaranıb və tiktoker ondan “TikTok” canlı yayımlarında hədiyyələr göndərməsini istəyib. Zərərçəkmiş iddia edib ki, müxtəlif vaxtlarda ona kart hesabından pul köçürüb, görüşlərdən sonra isə 300-500 manat məbləğində və digər hədiyyələr verib.

Kərimovun istintaq ifadəsində qeyd olunub ki, sonradan Xəlilovanın onun telefonuna müdaxilə etdiyindən şübhələnib və ondan uzaqlaşmağa başlayıb. O iddia edib ki, bundan sonra tiktoker onda rüsvayedici şəkillərinin olduğunu deyərək pul və avtomobil tələb edib, tələbləri yerinə yetirilməsə, sosial şəbəkələrdə onu biabır edəcəyi ilə hədələyib.

İfadədə həmçinin bildirilib ki, zərərçəkmiş təzyiqlər səbəbindən 42 min manatlıq avtomobilini sataraq pulu ona verib.

Lakin Xalid Kərimov məhkəmədə çıxış edərək elan olunan ifadəni təkzib edib. O bildirib ki, istintaq zamanı onun adından yazılan ifadə vəkil və müstəntiq tərəfindən hazırlanıb.

Onun vəkili Mirdamət Qədirli də müdafiə etdiyi şəxsin istintaqdakı ifadəsinin müstəntiqin təxəyyülü olduğunu məhkəmənin diqqətinə çatdırıb.

Məhkəmənin növbəti iclası aprelin 14-nə təyin edilib.

Qeyd edək ki, Xalid Kərimovun şikayəti əsasında tiktoker barəsində cinayət işi başlanıb. O, Suraxanı Rayon Polis İdarəsinə müraciətində Aybəniz Xəlilovanın ondan hissə-hissə olmaqla 836 min manat pul tələb etdiyini bildirib.

İstintaq orqanı tərəfindən ona qarşı Cinayət Məcəlləsinin 182.3.2-ci (külli miqdarda hədə-qorxu ilə tələb etmə) və 221.3-cü (xuliqanlıq) maddələri ilə ittiham irəli sürülüb.

Məlumata görə, şikayətçi ilə tiktoker uzun müddət sevgili münasibətində olublar.