Türk Dövlətləri Təşkilatı (TDT) Xarici İşlər Nazirləri Şurası Yaxın Şərqdəki son inkişaflarla bağlı birgə bəyanat qəbul edib. Bəyanat 7 mart 2026-cı ildə İstanbul şəhərində keçirilən toplantıdan sonra yayımlanıb.

Bəyanatda qeyd olunub ki, toplantı zamanı regionda və dünyada baş verən son hadisələr, xüsusilə də Yaxın Şərqdə artan silahlı münaqişələr və onların yaratdığı humanitar problemlər ətraflı müzakirə edilib. Nazirlər bölgədə artan zorakılıq və bunun insan həyatına, sabitliyə və təhlükəsizliyə ciddi təsirindən dərin narahatlıq ifadə ediblər.

Sənəddə mülki insanların həyatını təhlükə altına qoyan və regionda sabitliyi pozan bütün hərəkətlər qəti şəkildə pislənib. Eyni zamanda vurğulanıb ki, TDT üzv dövlətlərinin təhlükəsizliyinə yönələn hər hansı təhdid bütün təşkilat üçün narahatlıq doğurur və güc tətbiqi qəbuledilməzdir.

Nazirlər həmçinin İran İslam Respublikası ərazisindən Türkiyə Respublikası və Naxçıvan Muxtar Respublikası istiqamətində həyata keçirilən hücumları qətiyyətlə pisləyiblər. Onlar bu cür hərəkətlərin regionda gərginliyi daha da artırdığını və eskalasiya riskini genişləndirdiyini bildiriblər.

Bəyanatda Azərbaycan Respublikası və Türkiyə Respublikası nin suverenliyi, ərazi bütövlüyü və təhlükəsizliyinə güclü dəstək ifadə olunub, hər iki ölkənin xalqları və hökumətləri ilə tam həmrəylik bir daha təsdiqlənib.

Nazirlər münaqişələrin beynəlxalq hüquqa və Birləşmiş Millətlər Təşkilatı Nizamnaməsinin prinsiplərinə uyğun olaraq dialoq yolu ilə həllinin vacibliyini vurğulayıblar. Onlar eskalasiyanın dərhal azaldılması, qarşıdurmaların dayandırılması və tərəflərin danışıqlar masasına qayıtması üçün çağırış ediblər.

Sənəddə həmçinin bildirilib ki, Yaxın Şərqdə uzunmüddətli qeyri-sabitlik qlobal enerji bazarlarına, ticarət marşrutlarına, ərzaq təhlükəsizliyinə və miqrasiya axınlarına mənfi təsir göstərə bilər.

Nazirlər eyni zamanda Fələstin məsələsinin müvafiq BMT qətnamələrinə uyğun olaraq iki dövlət prinsipi əsasında ədalətli və davamlı həllinin vacibliyini qeyd edərək, xüsusilə Qəzza da yaşanan humanitar böhranın aradan qaldırılması üçün beynəlxalq əməkdaşlığa hazır olduqlarını bildiriblər.

TDT üzv ölkələrinin xarici işlər nazirləri regionda sülh və sabitliyin bərpasına yönəlmiş bütün beynəlxalq təşəbbüsləri dəstəkləməyə hazır olduqlarını vurğulayıb və məsələ ilə bağlı koordinasiyanı davam etdirmək barədə razılığa gəliblər.