Azərbaycan Respublikasının Xarici İşlər Nazirliyi Yaxın Şərq ölkələrində olan Azərbaycan vətəndaşlarının təxliyəsi ilə bağlı məlumat yayıb.

Nazirlikdən bildirilib ki, hazırda Birləşmiş Ərəb Əmirliklərinin hava məkanının yenidən bağlı olması nəzərə alınaraq regionda qalan Azərbaycan vətəndaşlarının ölkəyə qaytarılması istiqamətində zəruri planlaşdırma işləri aparılır.

Qeyd olunub ki, Körfəz ölkələrində fəaliyyət göstərən diplomatik missiyalara verilmiş tapşırıq əsasında vətəndaşların siyahıya alınması həyata keçirilib. İlkin məlumatlara əsasən 5 ölkədə təxminən 1000 nəfər Azərbaycan vətəndaşı təxliyə üçün müraciət edib. Onlardan 490 nəfər BƏƏ-də, 220 nəfər Səudiyyə Ərəbistanında, 200 nəfər Qətərdə, 23 nəfər Bəhreyndə, 26 nəfər isə Küveytdədir.

Azərbaycan vətəndaşları üçün əsas turizm istiqamətlərindən biri olan BƏƏ-də, xüsusilə də Dubay şəhərində ölkəmizin Baş Konsulluğunun Flydubai aviaşirkəti ilə apardığı danışıqlar nəticəsində Dubay–Bakı istiqamətində uçuşlar hava məkanında məhdudiyyətlərin qismən aradan qaldırılmasından sonra bərpa olunub. Martın 3–5-də həyata keçirilən uçuşlarla 755 nəfər Azərbaycan vətəndaşı ölkəyə qayıdıb.

Təxliyəyə ehtiyac duyulan digər əsas istiqamət olan Səudiyyə Ərəbistanı üzrə isə 4 mart 2026-cı il tarixində Azərbaycan Hava Yollarına (AZAL) məxsus xüsusi reyslə Ciddə şəhərindən 193 nəfər Azərbaycan vətəndaşı, həmçinin 9 nəfər Gürcüstan vətəndaşı olan azərbaycanlı və 5 nəfər Rusiya vətəndaşı olan azərbaycanlı olmaqla ümumilikdə 207 nəfər ölkəyə təxliyə edilib.

Bundan əlavə, Qətər, Bəhreyn və Səudiyyə Ərəbistanında qeydiyyata düşmüş vətəndaşların diplomatik nümayəndəliklərin təşkil etdiyi avtobuslarla Ciddəyə çatdırılması təmin olunub və AZAL-ın Ciddə–Bakı reysi ilə 7 mart 2026-cı il tarixində 203 nəfər (o cümlədən 2 nəfər Rusiya vətəndaşı olan azərbaycanlı və 1 nəfər Gürcüstan vətəndaşı olan azərbaycanlı) Azərbaycana geri qayıdıb.

XİN həmçinin bildirib ki, İranda olan Azərbaycan vətəndaşlarının quru yolu ilə ölkəyə maneəsiz keçidi üçün Azərbaycan Respublikası Nazirlər Kabineti yanında Operativ Qərargah tərəfindən müvafiq qərar qəbul edilib və aidiyyəti qurumlara tapşırıqlar verilib. İndiyədək 300 nəfər Azərbaycan vətəndaşı İrandan quru yolu ilə ölkəyə gəlib.

Nazirlik qeyd edib ki, regiondakı vəziyyət diqqətlə izlənilir və vətəndaşların təhlükəsiz şəkildə təxliyəsi üçün zəruri tədbirlər davam etdirilir.