5 mart 2026-cı il tarixində İran İslam Respublikasının xarici işlər naziri Seyid Abbas Əraqçi Azərbaycan Respublikasının xarici işlər naziri Ceyhun Bayramova zəng edib.

Məlumata görə, telefon danışığı zamanı Ceyhun Bayramov İran ərazisindən Naxçıvan Muxtar Respublikasına pilotsuz uçuş aparatları ilə edilən hücumları qətiyyətlə pisləyib və buna etirazını bildirib. Nazir qeyd edib ki, Azərbaycan ərazisinə edilən bu hücumlar beynəlxalq hüququn norma və prinsiplərinə ziddir və regionda gərginliyin artmasına xidmət edir.

Seyid Abbas Əraqçi isə Naxçıvan ərazisinə dron hücumları ilə bağlı narahatlığını ifadə edib və İran tərəfi ilə hərbi qurumların hadisə ilə bağlı araşdırma apardığını bildirib. O, hücum nəticəsində yaralanan mülki şəxslərə şəfa diləyib.

Telefon danışığı zamanı Azərbaycan tərəfi hücumla bağlı İran tərəfindən üzr istənilməsini, araşdırmanın nəticələri barədə qısa müddətdə izahat verilməsini və bu kimi halların gələcəkdə təkrarlanmaması üçün zəruri tədbirlərin görülməsini gözlədiyini diqqətə çatdırıb.

Əraqçi həmçinin bildirib ki, İran Azərbaycana qarşı hər hansı hücum həyata keçirməyib və baş verən hadisənin iki ölkə arasındakı münasibətləri pozmaq məqsədilə üçüncü tərəf tərəfindən törədilmiş ola biləcəyini istisna etmir. İranlı nazir hadisə nəticəsində yaralanan 4 Azərbaycan vətəndaşına görə təəssüfünü ifadə edib.