Həbsdə olan və 15 gündür aclıq aksiyası keçirən müxalif siyasətçi Tofiq Yaqublunun səhhətinin pisləşdiyi bildirilir.

Bu barədə onun qızı Nigar Həzi sosial media hesabında vəkil Nemət Kərimliyə istinadən məlumat verib.

Martın 10-da saxlanıldığı Bakı İstintaq Təcridxanasında T.Yaqublu ilə görüşən vəkil bildirib ki, həkimlərin müayinəsindən sonra siyasətçinin 10 kiloqram çəki itirdiyi müəyyən olunub. Bildirilib ki, onun qan təzyiqi də aşağı – 60/90 səviyyəsindədir.

Vəkil T.Yaqublunun xeyli arıqladığını, səsinin zəiflədiyini və rənginin tutqunlaşdığını da qeyd edib.

Məlumata görə, T.Yaqublu fevralın 23-də saxlanıldığı təcridxanada bir həftəlik cərimə kamerasına (“karser”) salınıb və həmin vaxtdan aclıq edir. Müəssisə rəhbərliyi qərarı onun “kamerada axtarışa mane olması” ilə əsaslandırıb.

T.Yaqublu daha əvvəl vəkili vasitəsilə verdiyi açıqlamada aclığa başlamasını “əsassız şəkildə karserə salınması”, həmçinin barəsində çıxarıldığını bildirdiyi “qanunsuz məhkəmə hökmü” ilə izah edib.

Milli Şuranın və Müsavat Partiyasının üzvü olan T.Yaqublu ötən il martın 10-da Bakı Ağır Cinayətlər Məhkəməsinin hökmü ilə 9 il azadlıqdan məhrum edilib. O, Cinayət Məcəlləsinin külli miqdarda ziyan vurmaqla dələduzluq və saxta sənəd hazırlama və ya istifadə etmə maddələri ilə təqsirli bilinib.

Siyasətçi isə ittihamları qəbul etmir və onları siyasi motivli hesab edir.

Qeyd edək ki, T.Yaqublu daha əvvəl də həbsdə olarkən aclıq aksiyası keçirib. Onun həbsi ilə bağlı bəzi beynəlxalq qurumlar, o cümlədən ABŞ və Avropa İttifaqı narahatlıq ifadə etmişdi. 2016-cı ilin martında o, əfv sərəncamı ilə azadlığa buraxılmışdı.