İsveçrədə siyasi mühacir həyatı yaşayan jurnalist Kamran Nəsirlinin redaksiyamıza göndərdiyi müraciəti:

“Bağlanmış Hürriyyət, Turan və AzərFreedom jurnalisti Kamran Nəsirliyə polis çağırışı
Azərbaycanda müstəqil mediaya qarşı davam edən təzyiqlər fonunda daha bir jurnalist polis orqanına çağırılıb.
Bağlanmış Hürriyyət və Turan media orqanları ilə əməkdaşlıq etmiş, hazırda AzərFreedom platformasında jurnalist fəaliyyəti göstərən Kamran Nəsirliyə Bakı şəhəri Nərimanov Rayon Polis İdarəsi tərəfindən rəsmi çağırış göndərilib.

Daxili İşlər Nazirliyinin Nərimanov RPİ-nin 18-ci Polis Şöbəsi tərəfindən göndərilən bildirişdə Kamran Nəsirli barəsində “araşdırma aparıldığı” qeyd olunur və ondan müəyyən tarixdə polis idarəsinə yaxınlaşması tələb edilir.

Qeyd edək ki, Kamran Nəsirli uzun illərdir Azərbaycanda söz və mətbuat azadlığı, siyasi proseslər və insan hüquqları mövzusunda yazıları ilə tanınan jurnalistlərdəndir. O, fəaliyyət göstərdiyi media qurumlarının bağlanmasından, redaktorların və əməkdaşların həbs olunmasından sonra təzyiqlərin hədəfinə çevrilib.
Jurnalistin bildirdiyinə görə, polis çağırışı onun peşə fəaliyyəti və ictimai mövqeyi ilə birbaşa əlaqəlidir və bu hal Azərbaycanda jurnalistlərə qarşı davam edən sistemli təzyiqlərin növbəti nümunəsidir.

Kamran Nəsirli redaksiyamıza göndərdiyi məktubda bildirir ki, polis çağırışında hər hansı konkret ittiham göstərilmədən “araşdırma” aparıldığı qeyd olunub və bu, onun jurnalist fəaliyyəti ilə bağlı narahatlıqları daha da artırır.

Xatırladaq ki, son illər Azərbaycanda onlarla müstəqil jurnalist barəsində cinayət işləri açılıb, redaksiyalar bağlanıb, media nümayəndələri polisə çağırılıb və ya həbs olunub. Beynəlxalq təşkilatlar bu halları söz azadlığına ciddi zərbə kimi qiymətləndirir.”