Azərbaycan Xalq Cəbhəsi Partiyasının (AXCP) üzvü Anar Ərkivan 30 sutka müddətinə inzibati qaydada həbs olunub. Bu barədə AXCP-dən məlumat verilib.

Partiyanın açıqlamasına görə, AXCP fəalı Anar Ərkivan yanvarın 30-da saat 12:00 radələrində Bakı şəhərinin Sabunçu rayonunda kirayədə yaşadığı evdən çıxarkən 5–6 nəfər mülki geyimli şəxs tərəfindən saxlanılıb və 13-cü Polis Bölməsinə aparılıb.

Bildirilib ki, daha sonra Sabunçu Rayon Məhkəməsinin qərarı ilə Anar Ərkivan İnzibati Xətalar Məcəlləsinin 535.1-ci (polis əməkdaşının qanuni tələbinə tabe olmama) və 510-cu (xırda xuliqanlıq) maddələri ilə təqsirli bilinərək 30 sutka inzibati həbs cəzasına məhkum edilib.

AXCP rəhbərliyi irəli sürülən ittihamları əsassız və saxta adlandıraraq, Anar Ərkivanın şərlənərək həbs edildiyini bildirib.

Məsələ ilə bağlı rəsmi qurumlardan münasibət almaq mümkün olmayıb. Bununla belə, rəsmi strukturlar adətən ölkədə siyasi fəaliyyətə görə həbslərin olmadığını, saxlanılan şəxslərin yalnız törətdikləri hüquq pozuntularına görə məsuliyyətə cəlb edildiyini bildirirlər.

Qeyd edək ki, müxalifətdə olan AXCP-nin hazırda 20-dən çox üzvü və fəalı həbsdədir. Onların arasında partiya sədri Əli Kərimli də yer alır. Partiya bu həbslərin siyasi sifariş əsasında həyata keçirildiyini bəyan etsə də, rəsmi qurumlar bu iddiaları qəbul etmir.