USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
“Toplum TV işi” üzrə daha dörd nəfərə ittiham elan olunub
İyunun 2-də Bakı Ağır Cinayətlər Məhkəməsində “Toplum TV işi” üzrə təqsirləndirilən daha dörd nəfərə qarşı ittiham aktı elan edilib.
Məhkəmə prosesi hakim Azər Tağıyevin sədrliyi ilə keçirilib. İttiham aktı jurnalist Müşfiq Cabbarov, Əli Zeynalov, Ruslan İzzətli və Ramil Babayevə elan olunub. Prosesin növbəti məhkəmə iclası iyunun 23-nə təyin edilib.
Qeyd edək ki, “Toplum TV işi” üzrə ümumilikdə 10 nəfərə qarşı cinayət işi açılıb. Onların arasında “Toplum TV”nin həmtəsisçisi Ələsgər Məmmədli, jurnalistlər Fərid İsmayılov, Müşfiq Cabbar, “Demokratik Təşəbbüslər İnstitutu”nun rəhbəri və “III Respublika Platforması”nın spikeri Akif Qurbanov, platformanın qurucu üzvü Ruslan İzzətli, institut əməkdaşları Əli Zeynal, Ramil Babayev və İlkin Əmrahov var.
İttiham olunan şəxslərə ilkin olaraq Cinayət Məcəlləsinin 206.3.2-ci maddəsi – qaçaqmalçılıq, bir qrup şəxs tərəfindən əvvəlcədən əlbir olaraq törədildikdə ittihamı irəli sürülmüşdü. Lakin 2024-cü il yanvarın 17-də onlara qarşı daha ağır maddələrlə yeni ittihamlar elan olunub.
Bu iş üzrə jurnalist Elmir Abbasov barəsində polis nəzarəti, Şahnaz Bəylərqızı barəsində isə ev dustaqlığı qətimkan tədbiri seçilib.
“Toplum TV” yaydığı bəyanatda baş verənlərin peşə fəaliyyəti ilə birbaşa əlaqəli olduğunu bildirib və bunu müstəqil mediaya basqı kimi qiymətləndirib. Bir çox yerli və beynəlxalq hüquq müdafiə təşkilatları təqsirləndirilən şəxsləri siyasi məhbus kimi tanıyıb və Azərbaycan hakimiyyətini onları dərhal azad etməyə çağırıb.
