USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
AXCP Daşkəsən şöbəsinin sədri Ruzi Bağırov həbs edilib
Azərbaycan Xalq Cəbhəsi Partiyasının (AXCP) Daşkəsən rayon şöbəsinin sədri Ruzi Bağırov inzibati qaydada həbs olunub. Bu barədə məlumatı partiya sədri Əli Kərimli iyunun 13-də “Facebook” hesabında paylaşıb.
Əli Kərimlinin sözlərinə görə, Ruzi Bağırov İnzibati Xətalar Məcəlləsinin “polisin qanuni tələbinə tabe olmamaq” maddəsi ilə 30 sutka inzibati həbs cəzası alıb.
AXCP sədri hadisəni siyasi sifarişli hesab edir və bunu ölkədə “repressiyaların miqyasının genişlənməsi”nin növbəti nümunəsi kimi təqdim edib. Kərimli həmçinin AXCP-nin Daşkəsən şöbəsinin keçmiş sədri Sahib Məmməzadənin də ötən il narkotik ittihamı ilə 3 il müddətinə azadlıqdan məhrum edildiyini xatırladıb.
Əli Kərimli bildirib ki, hazırda ölkədə siyasi məhbusların sayı 375 nəfəri keçib və siyasi fəallara qarşı həbslər davam edir: “Rejimin rəqib siyasi düşərgədən hər bir qanunsuz həbsi ümumxalq qınağına məruz qalmalıdır. Xalqımız hər fürsətdə öz iradəsini ortaya qoymalıdır ki, siyasi həbslərə qarşıdır və bütün siyasi məhbuslara azadlıq tələb edir.”
Son aylarda AXCP-nin 10-a yaxın üzvü inzibati qaydada, azı 15 üzvü isə cinayət işləri üzrə həbs olunub. Partiya və üzvləri ittihamları rədd edir, bu həbsləri siyasi fəaliyyətlə əlaqələndirirlər.
Rəsmi qurumlardan məsələ ilə bağlı hələlik açıqlama verilməyib.
