Ermənistanın baş naziri Nikol Paşinyan Azərbaycan prezidenti İlham Əliyevin son çıxışında səsləndirdiyi fikirlərə cavab verib.

Xatırladaq ki, Prezident İlham Əliyev noyabrın 3-də Azərbaycan Milli Elmlər Akademiyasında çıxış edərkən bildirib ki, hazırkı Ermənistan ərazisi tarixi Azərbaycan torpaqlarıdır və azərbaycanlıların bu torpaqlara qayıtması ideyası Ermənistanı qorxutmamalıdır.

Paşinyan isə noyabrın 4-də Yerevanda keçirilən beynəlxalq sülh konfransında bu açıqlamaya münasibət bildirib. O, Azərbaycan prezidentinin dediklərinə birbaşa cavab vermək istəməsə də, “çar dövrü xəritələrinə” istinad edərək belə deyib:

“Əgər çar dövrünə aid xəritələrə baxsaq… Mən artıq Kirovabad və Kirovakanı qeyd etmişəm, amma Yelizavetpol və Aleksandropoldan danışmamışam. Başqa sözlə, biz bir seçim etməli olarıq”.

Paşinyan bildirib ki, hər iki tərəf bir-birinə qarşı ərazi iddiaları səsləndirəndə bu, təhlükəli gərginlik yaradır:

“Ermənilər Qarabağ və Gəncəyə iddia irəli sürəndə, azərbaycanlılar da Yerevan və Sevandan danışacaq. 30 illik sosial və psixoloji reallığı sadəcə bir düyməni basmaqla dayandırmaq mümkün deyil”.

Baş nazir tarixi kontekstin düzgün qiymətləndirilməsinin vacibliyini vurğulayıb:

“Əgər yunanlar Böyük İskəndəri, italyanlar da Roma imperiyasını yada salsalar, onda hamımız hara gedib çıxarıq? Biz artıq yeni bir tarix yaratmışıq. Keçmişi gələcəkdən ayırmağı bacarmalıyıq”.

Paşinyan Azərbaycan tərəfinin azərbaycanlıların Ermənistana qayıtması təşəbbüsünü “təhlükəli” adlandırıb.

Qeyd edək ki, avqustun 8-də Vaşinqtonda Azərbaycan və Ermənistan arasında sülh sazişi paraflanıb. Sənəd iki ölkə arasında diplomatik münasibətlərin qurulmasını və sülhün təmin edilməsini nəzərdə tutur.