Azərbaycan Xalq Cəbhəsi Partiyasının (AXCP) Qaradağ rayon şöbəsinin üzvü Rahil Quliyevə cinayət işi açılıb. Bu barədə onun qardaşı, partiya sədri Əli Kərimlinin ictimai əsaslarla mühafizəçisi Elnur Quliyev sosial şəbəkədə məlumat paylaşıb.

Onun sözlərinə görə, Rahil Quliyev iyunun 7-də Qaradağ Rayon Polis İdarəsi tərəfindən saxlanılıb. Lakin ona qarşı hansı maddə ilə cinayət işi açıldığı hələlik açıqlanmayıb.

Qeyd edək ki, Rahil Quliyev mayın 6-da inzibati qaydada 30 sutka müddətinə həbs edilmişdi və yaxın günlərdə həbsdən azad olunmuşdu. O, azadlığa çıxdıqdan sonra barəsində cinayət işi açılan ikinci AXCP üzvüdür.

Bundan əvvəl, mayın 29-da partiya sədri Əli Kərimlinin ictimai əsaslarla sürücüsü Zaur Rzalıya qarşı Cinayət Məcəlləsinin 228.5-ci maddəsi ilə (qanunsuz olaraq qaz silahını, soyuq silahı, o cümlədən soyuq atıcı silahı əldə etmə, satma və ya gəzdirmə) cinayət işi açılmışdı. Həmin gün Zaur Rzalı sərbəst buraxılsa da, onun ölkədən çıxışına qadağa qoyulmuşdu.

Son aylarda AXCP sədri Əli Kərimlinin ictimai əsaslarla mühafizəçisi və sürücüsü olmuş bir sıra şəxslərə qarşı həm inzibati, həm də cinayət işləri əsasında həbslər həyata keçirilib. Mayın 20-də mühafizəçi Novruz Tağıyev dələduzluqda ittiham olunaraq 4 aylıq həbs edilib. Həmin gün sürücü Rəşad Əliyev 25 sutka inzibati həbs cəzası alıb. Mayın 5-də isə Ə.Kərimlini tədbirlərə aparan Asam Əli və mühafizəçi Kənan İsmayıl 30 sutka inzibati qaydada həbs olunublar.

AXCP-nin digər üzvləri də müxtəlif maddələrlə uzunmüddətli həbs cəzalarına məhkum olunub. Onlardan biri – Niyaməddin Əhmədov 2021-ci ildə terroru maliyyələşdirmə ittihamı ilə 13 il azadlıqdan məhrum edilib. Kənan Basqal isə bu ilin martında bıçaqlama hadisəsi ilə əlaqədar həbs olunub. Partiya üzvləri irəli sürülən ittihamları qəbul etmədiklərini bildirirlər.

Hazırda AXCP-nin 15-ə yaxın üzvü uzunmüddətli həbsdədir.