Azərbaycan Xalq Cəbhəsi Partiyasının (AXCP) sədri Əli Kərimlinin ictimai əsaslarla sürücüsü olan Zaur Rzalıya qarşı cinayət işi açılıb.

Partiya üzvlərinin verdiyi məlumata görə, Zaur Rzalı mayın 29-da Nərimanov Rayon Polis İdarəsinə çağırılıb və ona qarşı Cinayət Məcəlləsinin 228.5-ci maddəsi – qanunsuz olaraq qaz silahını, soyuq silahı, o cümlədən soyuq atıcı silahı əldə etmə, satma və ya gəzdirmə – ilə cinayət işi açıldığı bildirilib.

Rzalı istintaqa cəlb olunduqdan sonra sərbəst buraxılsa da, ölkədən çıxışına qadağa qoyulub. O, özünün “Facebook” hesabında paylaşdığı açıqlamada bu cinayət işini siyasi fəaliyyəti ilə əlaqələndirib:

“Hələlik nisbi azadlıqdayam, amma bilin ki, heç bir repressiya bizləri yolumuzdan döndərə bilməz”, – deyə Rzalı yazıb.

Qeyd edək ki, o, aprelin 1-də polisə müqavimət ittihamı ilə 30 sutka inzibati həbs cəzası almışdı.

Son aylarda Əli Kərimlinin yaxın ətrafında ictimai əsaslarla fəaliyyət göstərən şəxslərə qarşı müxtəlif ittihamlarla həm inzibati, həm də cinayət işlərinin açılması müşahidə olunur.
• Mayın 20-də Kərimlinin sabiq mühafizəçisi Novruz Tağıyevə qarşı dələduzluq ittihamı ilə cinayət işi açılıb və o, 4 aylıq həbs qətimkan tədbiri ilə həbs edilib.
• Həmin gün partiya sədrinin digər keçmiş sürücüsü Rəşad Əliyev isə 25 sutka inzibati həbs cəzası alıb.
• Mayın 5-də, AXCP sədrini tədbirlərə aparmış Asam Əli və mühafizəçisi Kənan İsmayıl da 30 sutka həbs olunublar.
• Partiya sədrinin digər mühafizəçisi Niyaməddin Əhmədov isə 2021-ci ildə “terrorizmin maliyyələşdirilməsi” ittihamı ilə 13 il azadlıqdan məhrum edilib.
• 2024-cü ilin martında isə digər mühafizəçi Kənan Basqal bir şəxsi bıçaqlama ittihamı ilə həbs olunub.

AXCP bu həbslərin siyasi motivli olduğunu bildirir. Partiyanın məlumatına görə, hazırda 15-ə yaxın üzvü uzunmüddətli həbsdədir.